Llingua

IU lleva al Congresu la Especialidá d'Asturianu

DAMIÁN BARREIRO . UVIÉU - 30/01/2012 A LES 16:25:41

El Grupu d'IU nel Congresu, al traviés del diputáu Gaspar Llamazares, acaba de presentar cuatro preguntes sobre la promoción del usu de la llingua asturiana y el reconocimientu de la Especialidá docente de los profesores qu'imparten la materia. La tramitación realizóse de manera billingüe, n'asturianu y castellanu. Según anuncien dende IX, esti va ser el primer pasu pa presentar una proposición na Cámara baxa.

Les preguntes traten sobre'l nivel de conocimientu del Ministeriu d'Educación sobre la realidá educativa del idioma, los sos resultaos pedagóxicos y la so contribución a l'adquisión de les competencies básiques. La segunda de les cuestiones refierse a la valoración que faen dende'l Ministeriu sobre la demanda de la Especialidá «de prácticamente tola comunidá educativa asturiana, la Xunta Xeneral, la Xunta de Personal Docente y el mesmu Conseyu Escolar del Estáu». Otra manera, pregunten qué tien pensao facer l'Estáu pa facer efectiva la demanda y si dende'l Ministeriu consideraron les ventayes educatives, curriculares y de planificación que representa'l reconocimientu de la Especialidá.

El documentu, qu'acaba d'entrar en procesu de tramitación, usa'l castellanu y l'asturianu y empieza falando de la regulación llegal de la enseñanza del idioma propiu y de la formación del profesoráu, «que tien un calter regláu dafechu nos estudios qu'ufierta la Universidá d'Uviéu». Sicasí, recuerden que, a pesar de too, «la docencia recái en manes de profesores interinos o n'espectativa de destín, lo que trai arreyaos problemes pa l'asignatura y una desigualdá de tratu pal profesoráu».

Dende IU recuerden que por estos argumentos, en xunu del 2008, el Conseyu Escolar del Estáu dio'l preste al reconocimientu de la Especialidá, «l'únicu elementu que da seguranza de la estabilidá del profesoráu, al permitir la convocatoria d'oposiciones, l'inxerimientu na plantiya del centru o acceder a concursos de tresllaos, amás de que ye un elementu de racionalización alministrativa, pedagóxica y económica». Por too ello, soliciten al Ministeriu, l'únicu órganu con capacidá alministrativa nesti ámbitu, «una acción decidida dende'l puntu de vista de la regulación de les especialidaes docentes».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam