Cultura

Llangréu acueye’l I Certame asturianu de Pandereteres y Pandereteros

04/06/2010 a les 12:20:07

Llangréu acueye’l 5 de xunu un alcuentru de pandereta qu’entama’l Colectivu Sociocultural Filanderes en collaboración col Conceyu de Llangréu y con Cajastur. El llamáu I Certamen Rexonal de Pandereteres y Pandereteros tien l’oxetivu de convertise nun puntu d’alcuentru de tolos músicos que toquen esi instrumentu, que nos últimos años vien garrando un puxu especial dientro del ámbitu del folclore gracies a l’aparición de grupos como Herbamora o les Pandereteres de Fitoria, y consolidase como un espaciu de celebración y reflexón alredor de los cantares populares.

L’alcuentru empieza a les cuatro y media de la tarde cola acoyida de los participantes na sé de Les Filanderes, na cai Cipriano Pedrosa. Una hora depués, ta previsto que los participantes celebren un pasacáis dende les instalaciones del colectivu hasta la Casa la Cultura de Sama, instalada nel edificiu de les Escueles Dorado.

Ellí ta programáu l’actu fuerte de la tarde. Primero, los participantes nel alcuentru van actuar enriba l’escenariu de la Casa la Cultura. Depués, esi mesmu marcu va valir pa que públicu y músicos faigan un homenaxe al pandereteru llangreanu Celo del Yanu. Esti últimu actu cuenta cola participación del músicu y investigador Xosé Ambás, que va facer de presentador. El conductor de la serie documental Camín de cantares yá confirmó la so presencia en Llangréu pa participar nestos alcuentros que se centren nun instrumentu pol qu’él tien un ciñu especial.

Los actos acaben a les siete y media de la tarde con una espicha na sé de Les Filanderes a la que tán convidaos tolos participantes nesta primer convocatoria.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam