Les Noticies.com. Diariu dixital. 17-05-2012
Llamazares va usar l'asturianu nel Congresu pa pidir el reconocimientu de la Especialidá
DAMIÁN BARREIRO. UVIÉU - 19/01/2012 A LES 14:17:56Gaspar Llamazares, diputáu d'IX nel Congresu, va tramitar na Comisión d'Educación y Cultura'l reconocimientu de la Especialidá pal profesoráu de l'asignatura d'asturianu. El diputáu va facer una batería de preguntes nel Parllamentu español pa pidir que'l Ministeriu reconoza la especialidá docente. Amás, la tramitación va facese de manera billingüe, n'asturianu y castellanu, «porque nun sería coherente tratar esti tema n'otra llingua», indicó Llamazares.
Asina lo anunció’l diputáu depués d'un conceyu cola presidenta de l'Academia de la Llingua (ALLA), Ana Cano, nel que tamién participaron Jesús Iglesias, portavoz d'IX; Emilia Vázquez, miembru d'IX na Comisión de Cultura de la Xunta Xeneral; y Xosé Antón González Riaño, miembru de l'ALLA.
La xunta fíxose pa tratar cola institución les actuaciones qu'IX va desenvolver pa cumplir colos sos compromisos electorales sobre la llingua del país. Ente ellos taba llevar al Congresu'l reconocimientu de la Especialidá d'Asturianu. «Nestos momentos hai 264 profesores que tienen la formación, pero nun tienen un reconocimientu que depende del Ministeriu d'Educación, cuando'l Conseyu Escolar del Estáu recomendó'l reconocimientu de la Especialidá nel 2008», esplicó’l diputáu d’IX.
La tramitación de les preguntes y la proposición énte la Comisión d'Educación y Cultura van facese en castellanu y n'asturianu, «pa visibilizar y normalizar nel Congresu la existencia del asturianu». Llamazares comentó que nun se pue descartar que'l Parllamentu nun acepte la tramitación, porque na Cámara Baxa namás acepten el castellanu, «anque l'usu d'espresiones o parrafos n'otres llingües del Estáu si se ta aceptando de fechu».
Otra manera, la presidenta de l'ALLA, depués de que-y lo preguntaren los periodistes, fixo referencia al recorte nun 27% del presupuestu de la institución, «que vuelve a cifres de 1998». Cano afirmó que la rebaxa del presupuestu va afectar mui sustancialmente a l'ALLA, «porque'l presupuestu que teníemos yá yera mui axustáu, pero agora namás vamos tener pa pagar el gastu de personal, de mantenimientu y pa organizar el Día de les Lletres, la UABRA y les Xornaes d'Estudiu».
Asina, la institución diz que cola partida de 167.000 euros, 60.000 euros menos que nel 2011, nun van poder sacar publicaciones, investigaciones, concursos y siguir afondando na normativización y publicar estos trabayos, «ún de los puntos fundamentales del nuestru trabayu; amás, estos estudios nun tien sentíu publicalos dientro diez años». Otra manera, dixo que nun diben poder facer el III Estudiu Sociollingüísticu d'Asturies o tener becarios dientro de l'ALLA. P'acabar, Ana Cano esperó que tolos grupos políticos se pongan d'alcuerdu, «porque con esti presupuestu nun vamos poder llevar alantre’l trabayu pal que foi creada la institución«.
Comentarios fechos (18)
Sumiciu 20/01/2012 a les 15:19:03
Nuberu, nun me presta facer d'abogáu del diablu, pero ye lo que toca. La verdá ye qu'IX foi el partíu que fizo más coses pol asturianu nestos años: cartelería y campañes billingües de Xusticia y Vivienda, oficialización de la toponimia (el PSOE por cuenta propia nun lo quier facer), planes de normalización y ordenances de L.lena, Cangas o Xixón. En Cangas y L.lena ye onde más avanzó la política llingüística, son los únicos conceyos que se moyaron colo de valorar el conocimientu d'asturianu nes places a funcionarios, y taben d'alcaldes los que taben. Y hai que ver si iniciatives privaes como l'etiquetáu del vinu de L.lumés diben salir p'alantre si nun fuera pola política llingüística de Cangas. Los servicios de normalización tamién existen en parte gracies a que taba IX nel gobiernu. Ye poco tovía, pero na posición que taba'l partíu y en comparanza colo que ficieron tolos demás ye'l partíu que más fizo pol asturianu. Nesos años l'Academia y otres organizaciones asturianistes en cuenta d'aprovechar la coxuntura echaron mierda contra ellos. Agora llega Vallaure falando asturianu y yá tamos salvaos, aunque reduzan presupuestu y FAC en Xixón o Cangas tán echándose p'atrás na política llingüística. Lo de falar asturianu tamién lo ficieron dellos cargos d'IX ¡y del PSOE! eso nun ye nuevo nin cambia nada, namás engaña a los que nun salen de les noticies de los medios asturianistes. Creo que Llamazares nun acierta en toles coses que quier facer, pero la crítica tien que ser constructiva sabiendo que los otros 349 diputaos nun quieren saber nada del asturianu, incluyíu "l'asturianista" de Foro.
Nuberu 20/01/2012 a les 13:44:21
Estimado amigo ¨pordicir¨,soy consciente de que cometo muchas faltas de ortografia en cualquier lengua que escriba,por ejemplo ¨haber¨ como haces reseña desde esa educacion y elegancia de la que pareces carecer.Yo evidentemente ni voy ni ire nunca de cultureta por la vida dando lecciones y menos utilizando el sarcasmo,soy un simple obrero,eso lo dejo para los cultos como tu,mi humildad hace que no tenga el atrevimiento de corregir a nadie,aun a veces pudiendolo hacer,por la su forma de escribir y menos de esa manera.Piensa que siempre habra alguien mas culto que tu que tambien te podria corregir y ponerte en evidencia y no lo hace,piensalo un poquitin,te lo digo por decir.
pordicir 20/01/2012 a les 11:55:17
¿"Haber" si nos lo aclaren? ¡Igual ye verdá que faen falta academies! (sin acritú, collaciu), pero academies de la llingua, por exemplu, en inglés nun la tienen y marchen bastante bien. Seriedá tampoco suelen aportar muncho, polo menos les que van colos de la feria y tornen colos del marcáu. Necesaries, lo que se diz necesaries nun son, y eso val pa la RAE, pa la ALLA y demás. Pero voy date un poco de razón, Nuberu, porque'l problema pa mi nun ye tanto la institucion como tal, nin de la mayoría de los sos miembros (creo qu'hai xente estupendo allí metío) como la manera de comportase del grupín dirixente y más apoltronáu. Igual con un poco de renovación (trenta años dempués)y nueves cares y nuevos modales, esti tipu de discutinios que tanto nos envenenen nun se daba y enverde restar sumabamos.
Nuberu 20/01/2012 a les 10:51:17
Al marxen de les mios criticas hacia IU repeutu a la llingua asturiana,lo que nun acabo entender ye lo de ciertes persones escontra la ALLA,por que una coa eye tar excontra de los sos miembros,cosa lexitima nel caso de qu´unu nuntea alcuerdu cola so xestion,pero lo que nun acabo d´entender ye ha hai persones per ehi que quieren eliminarla,y eso ya nun me cabe na cabeza,una llingua ensin academia???,diran tamien lo mesmu de la Academia de la Lengua Española y pediran que se elimine???,diran lo mesmu de toes les cademies de toes les llingues o solu de la asturiana???.Haber si estos que dicen lo que dicen nos lo esplican,por que parez que como nun pueden acabar col asturianu como intentaben antes,agora intenten acabar coles instituciones como la ALLA qu´ademas del trabayu necesariu que requier una llingüa le d esi caracter de seriedá.Haber si nos lo aclaren.
Ramon 20/01/2012 a les 09:35:36
Por qué nun usen los diputados d'IU na Xunta Xeneral l'asturianu? ...
faciendo lo que va facer va provocar dos coses: que l'asturianu quede como una cosa pa encordiar; y que la clase política española siga asociando les llingües diferentes del castellanu a "guirigay".
¿Nun pue pidir la especialidá como pidi tolo demás: en castellanu? Y, depués, yá fuera'l Congresu usar l'asturianu con normalidá?, como fain los del BNG, ERC, Compromís ...
Yo la verdá que nun sé si queda algún asturianista que pueda creer na bona voluntá d'estos d'IU. Siguen pensando que somos imbéciles.
Entiendo que l'Academia tenga qu'agarrase a esto pa salir nos medios y que se vean les sos reivindicaciones ... pero nun sé si hasta'l puntu d'encontiar esta maniobras tan perxudiciales
Lesnoticies.com - Llamazares va usar l'asturianu nel Congresu pa pidir el reconocimientu de la Especialidá
Rueda de prensa na Academia de la Llingua.
15/05/2012 - El Festival Internacional de Cine dexa d'usar la forma «Xixón» nel logotipu
26/04/2012 - La Vuelta Ciclista a Asturies va usar la toponimia oficial
30/04/2012 - «Tenemos el retu de convencer a la sociedá de que l'asturianu paga la pena»
03/05/2012 - La XDLA llama a manifestase esti vienres 4 de mayu, Día de les Lletres Asturianes
19/04/2012 - La XDLLA convoca pal 4 de mayu la manifestación pola oficialidá
Esta web cuenta con una subvención de la Conseyería de Cultura y Deporte del Principáu d'Asturies
© Diariu LES NOTICIES y PUBLICACIONES ÁMBITU
Cai San Xuan 5, 3u derecha - 33003 - Uviéu
Tel. 985 204 601 - Fax. 985 221 537
Avisu Llegal -
Creitos -
Móvil
