Les Noticies.com. Diariu dixital. 22-02-2012
Llamazares va usar l'asturianu nel Congresu pa pidir el reconocimientu de la Especialidá
DAMIÁN BARREIRO. UVIÉU - 19/01/2012 A LES 14:17:56Gaspar Llamazares, diputáu d'IX nel Congresu, va tramitar na Comisión d'Educación y Cultura'l reconocimientu de la Especialidá pal profesoráu de l'asignatura d'asturianu. El diputáu va facer una batería de preguntes nel Parllamentu español pa pidir que'l Ministeriu reconoza la especialidá docente. Amás, la tramitación va facese de manera billingüe, n'asturianu y castellanu, «porque nun sería coherente tratar esti tema n'otra llingua», indicó Llamazares.
Asina lo anunció’l diputáu depués d'un conceyu cola presidenta de l'Academia de la Llingua (ALLA), Ana Cano, nel que tamién participaron Jesús Iglesias, portavoz d'IX; Emilia Vázquez, miembru d'IX na Comisión de Cultura de la Xunta Xeneral; y Xosé Antón González Riaño, miembru de l'ALLA.
La xunta fíxose pa tratar cola institución les actuaciones qu'IX va desenvolver pa cumplir colos sos compromisos electorales sobre la llingua del país. Ente ellos taba llevar al Congresu'l reconocimientu de la Especialidá d'Asturianu. «Nestos momentos hai 264 profesores que tienen la formación, pero nun tienen un reconocimientu que depende del Ministeriu d'Educación, cuando'l Conseyu Escolar del Estáu recomendó'l reconocimientu de la Especialidá nel 2008», esplicó’l diputáu d’IX.
La tramitación de les preguntes y la proposición énte la Comisión d'Educación y Cultura van facese en castellanu y n'asturianu, «pa visibilizar y normalizar nel Congresu la existencia del asturianu». Llamazares comentó que nun se pue descartar que'l Parllamentu nun acepte la tramitación, porque na Cámara Baxa namás acepten el castellanu, «anque l'usu d'espresiones o parrafos n'otres llingües del Estáu si se ta aceptando de fechu».
Otra manera, la presidenta de l'ALLA, depués de que-y lo preguntaren los periodistes, fixo referencia al recorte nun 27% del presupuestu de la institución, «que vuelve a cifres de 1998». Cano afirmó que la rebaxa del presupuestu va afectar mui sustancialmente a l'ALLA, «porque'l presupuestu que teníemos yá yera mui axustáu, pero agora namás vamos tener pa pagar el gastu de personal, de mantenimientu y pa organizar el Día de les Lletres, la UABRA y les Xornaes d'Estudiu».
Asina, la institución diz que cola partida de 167.000 euros, 60.000 euros menos que nel 2011, nun van poder sacar publicaciones, investigaciones, concursos y siguir afondando na normativización y publicar estos trabayos, «ún de los puntos fundamentales del nuestru trabayu; amás, estos estudios nun tien sentíu publicalos dientro diez años». Otra manera, dixo que nun diben poder facer el III Estudiu Sociollingüísticu d'Asturies o tener becarios dientro de l'ALLA. P'acabar, Ana Cano esperó que tolos grupos políticos se pongan d'alcuerdu, «porque con esti presupuestu nun vamos poder llevar alantre’l trabayu pal que foi creada la institución«.
Comentarios fechos (18)
Kamarada Kirillov 24/01/2012 a les 11:47:08
Buo, yá fiede l'argumentu de que nun podemos criticar "lo nuestro" porque damos munición al enemigu. Nun mos dices una verdá, Falo: nin "nós" somos una unidá, nin "l'enemigu" un bloque, nin tolos países anglófonos siguen la norma británica, nin ye bono que la llingua del pueblu tea en manes d'una entidá gubernamental, elitista y constituyida nun nuclín de poder ayén al control popular.
Falo 23/01/2012 a les 13:54:10
Vamos ver. L'Academia ye pernecesaria porque les llingües necesiten una norma d'escritura culta y una unidá que seya referencia palos falantes, y más nel casu de llingües, como la nuesa, que históricamente nun pudieron algamar una norma y tan dixebraes en dialeutos estremaos. L'inglés nun tien academia pero tien una norma, el nomáu inglés d'Oxford, que xurde de la modalidá llingüística normalizada n'esa prestixosa universidá, osia ye como si tuvier Academia, dafechu tolos países angloparlantes atienense a esi estándar. Per otru llau IU fexo pocu pel asturiano porque yera una de les sos propuestes estrella a la hora les eleciones, esi ye el quiz, si nun lo hubieren glayao a los cuatro vientos sedríen el partíu que más hubiera trabayao pel asturiano, pero al haber fecho de l'oficilidá ún de los pilares del so programa la so actitú posterior foi bien probetaya, ya que gobernó en coalición nesti país. Los fechos d'alcaldes son suyos y a ellos hai que atribuios, y non al partíu. Dempues d'esti rollu dicir que hai que trabayar pa sumar y non pa restar, que ye fatura el tar tou'l día chándonos coses en cara metantu los enemigos del asturianu son un bloque ensin resquiebres. Si de verdá se quier a la llingua y a Asturies hai que saber ser xenerosos colos erros de los asturianistes, que son los nuesos, y non da-y al enemigu munición.
Nuberu 23/01/2012 a les 11:36:46
Nun tenia pensao escribir mas comentarios,aunque tarde,acabaron espublizandu´l comentariu que nun salia.Voi facer delles puntualizaciones.Lo que fixo IU pola llingua (por ciertu mui pocu)foi cuadu taben con ellos Bloque por Asturies,y tamien cuandu taba Valledor,tanto unos como´l otru tuvieron que colar por que yera infumable lo de IU.Coses importantes pola llingua ye la llei de usu y promocion que impulso´l Partiu Asturianista non IU,en cuantu a lo que fain en dalgun ayuntamientu determinau,pues eso ye lo que fai dalgun ayuntamientu determinau,tamien puedese falar del de Cangas gobernando IU col PP o ye que solu representen los que interesen?.UHP yo nun voi a la universidá eso nun quier dicir que como yo nun voi haiga qu´eliminarla.Por ultimu,Gran Bretaña nun tien academia de la llingua??? bonu,creo que tampocu tien Constitucion,que facemos quitamos la Constitucion tamien???
UHP 23/01/2012 a les 10:28:32
Nuberu, ¿pa qué coño queréis los obreros auténticos como tu academies (y polo tanto grupinos sociales elitistes) pa dempués disculpar con esi resquemor fuera de tonu les faltes que contradicen les propies normatives académiques? ¿O ye que les academies solo son útiles pa obreros con sentíu del humor?
Nuberu 20/01/2012 a les 21:27:56
Me decepciona LES NOTICIES que nun me espublice´l comentariu caberu que fice´n respuesta por alusiones feches pol ultimu comentariu hacia mi.Repito,me decepciona LES NOTICIES que hasta güei veia como de los pocos requexos de la llibertá d´espresion na prensa asturiana.Nun voi facer mas comentarios nesti mediu.A partir d´esti momentu nun me unvieis mas invitaciones al mio correu pa que participe.
Lesnoticies.com - Llamazares va usar l'asturianu nel Congresu pa pidir el reconocimientu de la Especialidá
Rueda de prensa na Academia de la Llingua.
14/02/2012 - El Gobiernu rebaxa un 40% el presupuestu de l'ALLA y «pon en peligru a la institución y el procesu de normalización»
15/02/2012 - Cultura «llamenta» les declaraciones de la presidenta de l'Academia de la Llingua
23/01/2012 - La Vuelta a España comprométese a usar la toponimia oficial asturiana
06/02/2012 - El tramu de l'A-8 abiertu esti sábadu nun respeta la llegalidá toponímica
24/01/2012 - Los medios de comunicación d'Asturies inoren la toponimia oficial
Esta web cuenta con una subvención de la Conseyería de Cultura y Deporte del Principáu d'Asturies
© Diariu LES NOTICIES y PUBLICACIONES ÁMBITU
Cai San Xuan 5, 3u derecha - 33003 - Uviéu
Tel. 985 204 601 - Fax. 985 221 537
Avisu Llegal -
Creitos -
Móvil
