Cultura

Llamazares demanda nel Congresu que se ponga en marcha’l Plan del Prerrománicu

REDACCIÓN. UVIÉU - 27/01/2012 A LES 12:55:03

Gaspar Llamazares, diputáu d’Izquierda Xunida (IX) en Congresu, va pidir nuna Proposición non de Llei que se ponga en marcha y s’execute’l Plan Director pal Prerrománicu asturianu. Recuerda, sumándose a otres peticiones d’IX d’Uviéu y d’Asturies, que fai falta esti instrumentu actualizáu a les necesidaes presentes pa garantizar, de manera efectiva, la conservación y puesta en valor d’una «xoya cultural europea», declarada Patrimoniu de la Humanidá pola Unesco.

Tamién esixe, tanto na Comisión de Cultura del Congresu como nel Plenu, que s’estableza dalgún instrumentu permanente de collaboración ente’l Gobiernu estatal y el d’Asturies pa coordinar la execución de midíes de protección y promoción del Prerrománicu asturianu.

Na argumentación de la Proposición non de Llei, Llamazares esplica que’l Prerrománicu asturianu sufre «una situación de desdexamientu absurda y inalmisible». Alvierte de que dende l’añu 2000 lleva falándose d’un Plan del Prerrománicu que, depués d’una década, «y énte la indiferencia de tolos Gobiernos implicaos, nun se punxo en marcha». El diputáu asturianu recuerda que, va poco, el ministru de Cultura del Gobiernu anterior anunció la creación d’un Patronatu y una Comisión d’espertos, comprometiendo al empar la creación d’un Centru Internacional del Prerrománicu, ensin qu’hubiera avance nengún. Llamazares tamién recuerda qu’hai una base onde s’encontar pa trabayar, que ye’l plan redactáu por Fernando Nanclares y Antón Capitel, fechu pol Ministeriu de Cultura y financiáu pol de Vivienda, que duerme «el sueñu de los xustos en dalgún caxón».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam