Cultura

Lesnoticies.com ofrez un adelantu d’«Amor incendiariu», últimu discu de Dixebra

26/10/2009 a les 09:00:53

La banda de rock Dixebra presenta, dientro de la programación de Llanes al Cubo, el so nuevu trabayu discográficu, Amor incendiariu. La cita va ser el 1 de payares, a partir de les 21:00 hores na Carpa La Bombilla, en Llanes, onde’l veteranu grupu de rock and roll va interpretar, acompañáu de dalgunos invitaos d’excepción, el so nuevu repertoriu. «Quiero ser fierro», «Refugaya», «Blancos andantes», «Hai que poner», «De prau», «Tres minutos» o «Dinamiteru», son dalgunes de les canciones d’esti nuevu trabayu. LES NOTICIES.COM quier facer llegar a los sos llectores el tema «De prau», un ska folixeru con lletra de Quique Faes.

Amor incendiariu, quiciabes el más intensu de los discos de Dixebra, muévese estilísticamente ente’l punk-rock, el ska-reggae, el funk y el folk-rock. Rescampla’l númberu bultable d’instrumentos usaos, ente ellos acordión, violín, punteru, trombón, fliscornu, mandolina, buzuqui, banjo, guitara acústica o órganu, amás de los avezaos nel grupu (batería, baxu, guitarra eléctrica, saxo, trompeta y gaita); como novedá nesti apartáu de la instrumentación destaca’l fechu de que vuelven a recuperar, en delles pieces, la gaita tradicional asturiana. Ye por ello que nel conciertu del 1 de payares, la banda avilesina va tar acompañada nel conciertu por dalgunos de los meyores músicos del panorama asturianu. Asina, van acompañala Toño Gómez, trombón de La Bandina, Iván Lomas (Dj Pimp), campión del Estáu español de scratch, Lisardo Prieto, violín de Felpeyu y dellos miembros de la Banda de Gaites Llacín de Llanes.

En cuantes a los testos, vuelven a trabayar con escritores como Xandru Fernández o Quique Faes. D’esta vuelta incorporen a Francisco Álvarez, amás de los propios miembros del grupu. La temática va de la crítica social a llamaes a la solidaridá, la denuncia política o l’alcordanza, con referencies a la inmigración o a la situación en Palestina, ensin escaecer la realidá asturiana.

Los llectores de LES NOTICIES. COM tienen agora la oportunidá de sentir «De prau», un ska na meyor llinia de la banda referencial del rock asturianu.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam