Cultura

LESNOTICIES.COM estrena una serie documental sobre la vida d'Anita Sirgo

12/02/2010 a les 00:53:31

Nun ye la primer vez que’l cine s’ocupa de la vida d’Anita Sirgo, Anita la de Lada, pero sí la ocasión onde la lluchadora antifranquista más s’esplaya énte les cámares contando lo que foi la so vida, llegando a adentrase en terrenos que nunca contara públicamente hasta agora. La serie Una vida contada, producida por Ámbitu Audiovisual y dirixida por Ramón Lluís Bande, estrénase’l sábadu 13 de febreru en LESNOTICIES.COM, y tamién na páxina web d’El Comercio, col so testimoniu como exa y como continuidá de la serie de filmes que’l cineasta xixonés vieno desarrollando en títulos como Estratexa, De la Fuente o El Paisano y que, nesti casu, supón amás el primer resultáu de lo que Bande define como «un work in progress que punximos en marcha a común Vanessa Gutiérrez y yo y que bauticemos como Del silenciu y del que seguramente va haber títulos nuevos nun futuru próximu».

El director nun oculta, sicasí, qu’esta serie nació «del interés de siguir cola serie de películes-testimoniu que llevo faciendo dende hai unos años y tamién col de recuperar l’espíritu del trabayu periodísticu El país del silenciu, de Beatriz R. Viado y Vanessa Gutiérrez». D’esta manera, Una vida contada «nació cola idea de ser un llargumetraxe documental de dos hores de duración y pel camín alcontró la so forma definitiva de miniserie documental». «Seguramente», avanza Bande, «los próximos trabayos de la serie Del silenciu tamién van tener esta forma, buscando producir conteníos documentales pa toles pantalles coles que contamos nesti momentu, como les de sales de cine, televisiones, museos o Internet».

La parte más orixinal del proyectu, la de la so emisión na rede, «nun foi una decisión predeterminada, sinón dalgo qu’alcontré nel procesu d’edición del material». Bande diz que foi nesi momentu cuando descubrió que «como meyor diba funcionar yera apartándose del formatu habitual de documental de dos hores y buscando la serialización temática». Cada capítulu de los siete que conformen la serie recueye un momentu concretu de la vida d’Anita, dende la infancia y la so rellación colos fugaos hasta la tortura que sufrió nes cárceles franquistes, pasando pel matrimoniu o la militancia política. «Amás», añade’l cineasta, «poles característiques propies de la película, creí que meyor que buscar una plataforma convencional, como la televisión o los festivales, yera una bona obra pa probar Internet como pantalla de producción documental serializada». «Préstame buscar trescender los caminos d’exhibición tradicionales hasta’l momentu y buscar la manera de producir conteníos pa esta nueva y más qu’interesante pantalla que nos ofrez el presente y, sobre manera, el futuru», conclúi.

Anque la protagonista indiscutible de la serie ye Anita Sirgo, la incorporación de Vanessa Gutiérrez tamién permite «abrir la película a los terrenos de la ficción pa intentar reflexonar dende una perspectiva íntima y emocional, pero tamién política y social, sobre los procesos de construcción de la memoria colectiva y la identidá propia». Nesi sen, Bande nun quier escaecer que la serie constitúi, en realidá, «un retratu ensin adulterar d’Anita Sirgo conducíu pola so propia voz», lo que supón una «continuación directa de les mios películes testimoniu dedicaes a la recuperación de la memoria emocional de la esquierda asturiana», y qu’esa continuidá temática va acompañada d’una «continuidá formal evidente, sirviéndose d’esa especie de materialismu minimalista (que ye una definición que punxo la crítica y que yo asumo) que caracterizaba les anteriores».

La música, lo mesmo que nes otres películes documentales de Bande, tamién cuenta con un papel importante n’Una vida contada. Si n’Estratexa yera una pieza de Manta Ray la qu’ocupaba esti aspectu, De la Fuente contaba con una interpretación de Mariluz Cristóbal Caunedo y El Paisano acababa cola interpretación del cantar del mesmu títulu de Víctor Manuel, agora ye Nacho Vegas l’encargáu de ciarrar caún de los capítulos de la serie con una pieza compuesta especialmente pa ella y que se divide en siete cachos, ún por capítulu. «Nacho ye’l músicu habitual de les mios películes», cuenta Bande, «y agora había tiempu que nun trabayábemos xuntos y yá nos apetecía recuperar esa collaboración». Xeneralmente, Vegas trabayaba «faciendo una coda musical a los mios filmes, un temaque les ciarraba y que, en cierta manera, resumía’l tonu emocional de la historia que s’acababa de ver». Foi’l casu de filmes como Malu, L’aire les castañes o De la vida de les piedres. «Nesti casu», esplica’l director, «quiximos facer dalgo distinto. Nacho compunxo un retratu musical de la vida d’Anita y tresformó’l so testimoniu nuna canción con delles partes, y esto sirve tamién pa que la música xuegue un papel estructural, acompañando y complementando les partes más reflexives y, podemos dicilo asina, ficcionales de la cinta». Resumiendo, «a la vez que, capítulu a capítulu, va construyéndose la vida d’Anita, tamién se constrúi la canción, la traducción musical d’esa vida».

L’equipu técnicu d’Una vida contada complétase con David F. Pando (fotografía), Antonio de Benito (soníu directu) y Daniel González (edición). El sábadu 13 de febreru empieza a vese’l resultáu de la que ye la primer serie documental fecha n’Asturies pa Internet.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam