Votos: 6

• 1
• 2
• 3
• 4
• 5

Les radios llibres: un futuru ensin garantíes

Les radios non comerciales, les vecinales, les asociatives o les locales va bien d’años que se mueven na indefinición llegal. Una de les sos demandes constantes ye un marcu regulador que-yos garantice la supervivencia y evite les interferencies o solapamientos que se dan nes ondes y qu’impiden un funcionamientu normal d’estos medios. El proyectu de Llei Xeneral de la Comunicación Audiovisual impulsáu pol Gobiernu de Rodríguez Zapatero reconoz, a la fin, la existencia d’esta realidá y la necesidá de regulala, anque la propuesta del Executivu nun acaba de convencer a les radios comunitaries, que ven más limitaciones que garantíes pa la so continuidá na norma.

BEATRIZ R. VIADO
«La llei nun recueye nenguna midida pa garantizar o fomentar la existencia d’estos medios ciudadanos, ensin ánimu de lucru, al estrablecese restricciones y esixencies que nun se faen a les emisores comerciales», declaró la Rede de Medios Comunitarios nun comunicáu publicáu a nivel estatal, que critica tamién la falta de participación cola que’l Gobiernu ellaboró’l proyectu, qu’agora mesmo ta nel Senáu pendiente d’aprobase.

Na mesma llinia, AMARC (Asociación Mundial de Radios Comunitaries) denunció qu’esti proyectu de llei «fíxose dando’l llombu a la ciudadanía» y aseguró que «discrimina a les radios comunitaries». Esta asociación afirma que l’únicu interlocutor pal Gobiernu nesti asuntu foi la Unión de Televisiones Comerciales (UTECA), lo que respuende a la so acusación de que la llei «faise con una visión empresarial de la comunicación en cuenta de diseñase como un desarrollu de derechos fundamentales».

AMARC, una ONG al serviciu de la radio comunitaria y qu’agrupa a unos 3.500 miembros en 110 países, cuestiona que nun se sigan les directrices que marca la Unión Europea pa regular les radios comunitaries. Nesti sen, el Parllamentu européu, nel informe Los Medios del Tercer Sector de la Comunicación dedicáu a los medios audiovisuales impulsaos por entidaes ensin ánimu de lucru, indicaba qu’estes canales son un «preséu fundamental pa facilitar que la ciudadanía pueda participar activamente na sociedá».

La situación n’Asturies

En Radio Kras (105.0 FM), una de les radios llibres qu’emite dende 1985 en Xixón, considérase qu’hai una parte positiva nel proyectu: «Ye la primer vez qu’una llei reconoz los medios comunitarios, reconoz qu’existen y nómalos como medios diferentes a los públicos o los comerciales, lo que ye un avance depués de cuasi venticinco años, como pue ser el nuestru casu, de facer una comunicación alternatival», diz Falo Marcos, portavoz de la emisora. Sicasí, l’aspectu negativu ye qu’«esa mesma norma nun garantiza qu’esos medios comunitarios existan», amiesta Marcos. «Da la sensación de que la llei da más problemes pal so funcionamientu que soluciones, anque ye verdá que son cuestiones que tán por desenvolvese nos reglamentos y no que faiga cada comunidá autónoma», esplica’l portavoz de Radio Kras.

Delles de les barreres que se ven a la llei son los topes económiques que s’imponen a estes emisores, que nun pueden tener, de salir alantre la norma tal como ta, un presupuestu anual superior a los 50.000 euros nin almitir patrocinios. Frente a estos topes, Falo Marcos echa en falta que «nun se ponga nenguna midida pa que les radios comunitaries, a les que la llei-yos reconoz la importancia, puedan siguir emitiendo».

Ente les midíes que diben facilitar la supervivencia d’estos medios, tal como señala’l portavoz de Radio Kras, tán la d’acutar una parte del especiu radioeléctricu a les radios comunitaries y la de siguir l’exemplu de Francia, onde les radios comerciales paguen un canon pa subvencionar les radios comunitaries, «porque pertenecen a entidaes ensin ánimu de lucru y pa funcionar precisen, aparte de la xente asociao, dalgún apoyu económicu», esplica Marcos.

El tope de 50.000 euros anuales d’esplotación nun supón un problema nel casu concretu de Radio Kras, anque’l portavoz de la emisora recuerda qu’«hai radios que tienen dalguna persona contratada y eso yá supón una bona parte d’esa cantidá, a lo qu’hai que sumar los gastos d’arrendar el local, de mantenimientu de los equipos, etc., polo qu’al final esa cifra nun da muncho de sí». Ésta ye una de les crítiques que se fixeron dende la Rede Estatal de Medios Comunitarios, a la que pertenez Radio Kras, y que ta liderando les protestes contra’l proyectu de Llei de Medios Audiovisuales. Por estes razones, insístese en que s’articulen fórmules que dexen qu’haya estos medios. «Si nun se nos garantiza que vamos tener un puntu nel dial y que vamos poder sobrevivir económicamente va tar difícil la continuidá», afirma Falo Marcos.

Xuanxo Mariño, responsable de Radio Sele (106.1 FM), comenta que’l proyectu de llei nun quita duldes sobre «cuestiones fundamentales», como ye’l casu de la potencia que van tener les radios comunitaries: «Si nos dan 25 watios nun llegamos nin a la cera d’enfrente», indica Mariño. Con too y con eso, el coordinador de la emisora n’asturianu esclaria qu’ésti ye un puntu «que se supón que se detallará depués nel plan técnicu». Igualmente, el que se ciarre la puerta a que les radios non comerciales almitan publicidá implica «negar que medremos, que se pueda facer dalgo nuevo. Déxennos arrequexaos pa facer coses mínimes, polo que me parez que nun van cambiar muncho les coses», esplica’l responsable de Radio Sele. Nesti sen, Mariño soscribe la propuesta d’adoptar midíes asemeyaes a les de Francia, col canon pa les radios comunitaries que paguen les comerciales.

Vuelve Radio Sele

Otra manera, depués del apagón nes ondes que sufrió Radio Sele por cuenta del cambiu de la sé de les sos instalaciones, la emisora va volver al dial nun plazu bien curtiu: «Tardemos tantísimo porque nun nos dexaron poner los enllaces qu’usen les demás radios y hubimos tirar d’una tecnoloxía nueva, winmax, pa poder enllazar los estudios col centru emisor y echemos bien de tiempu en too esto, pero agora namás nos queda configurar los enllaces y en nada vamos tar nes ondes otra vez», esplica Xuanxo Mariño.

Dende Radio Nava (108.0 FM), emisora local impulsada pola asociación Aúpate, coincídese en destacar les duldes que xenera la norma y pídese que s’esclarien términos de manera que «nun entremos toos nel mesmu sacu», diz Diego Rodríguez, responsable de la emisora. «Fálase de radios pirates como si fóremos toos lo mesmo, pero ye distinto la xente que ta aprovechándose del dial con medios comerciales y que sí saquen beneficios de la publicidá, d’otros medios asociativos, llibres o comunitarios, como’l nuestru, onde se fai información d’interés xeneral y que tán abiertos a la llibre espresión de toles persones que quieran collaborar col proyectu», remarca Diego Rodríguez. Al empar, detéctase la necesidá de regular l’espaciu radioeléctricu, de manera qu’unes emisores nun pisen a otres, como ye’l casu de Radio Nava, onde’l so espaciu, tal como cuenta’l responsable de la canal, tien bien d’interferencies d’una radio relixosa qu’emite dende’l conceyu vecín de Siero. Amás, Diego Rodríguez adelántase a quien pueda ver n’Internet el futuru d’estes emisores: «Esa nun ye una solución», sostién. «Nós tamos n’Internet porque queremos y podemos, pero nun vamos renunciar al espaciu nes ondes», recalca.

Les llingües na llei

Ún de los aspectos que toca’l proyectu ellaboráu pol Gobiernu español ye la necesidá de que los medios miren pola diversidá llingüística del Estáu. Asina, nel Capítulu I dedicáu a los Derechos del Públicu indícase que «los operadores de servicios de comunicación audiovisual de titularidá pública han promover el conocimientu y la difusión de les llingües oficiales nel Estáu y de les sos espresiones culturales. Nesti sen, han contribuír a la promoción de la industria cultural, n’especial a la de creaciones audiovisuales vinculaes a les distintes llingües y cultures existentes nel Estáu».

Aparte d’esta declaración xenérica, l’artículu 5 d’esti proyectu fala del derechu a la diversidá cultural y llingüística: «Toles persones tienen el derechu a que la comunicación audiovisual incluya una programación n’abierto que reflexe la diversidá cultural y llingüística propia», diz esti artículu. Al empar, faise un llamáu a les comunidaes autónomes con idioma propiu «p’aprobar normes adicionales pa los servicios de comunicación audiovisual del so ámbitu competencial cola fin de promover la producción audiovisual na so llingua propia».

La regulación tocante a les llingües foi ún de los puntos criticaos poles asociaciones, sindicatos y radios comunitaries, qu’esta mesma selmana, el 9 de febreru, se concentraron énte’l Senáu pa reclamar meyores pa la norma. Una de les demandes que s’espresó en Madrid foi’l «desarrollu del derechu a la diversidá llingüística incorporando porcentaxes de programación en gallegu, vascu y catalán nos sos respectivos territorios».

TVG y convenios

La llei tamién trata les emisiones televisives de les cadenes públiques en comunidaes «con afinidaes llingüístiques y culturales». Nesti sen, ábrese la puerta a l’aspiración de la TVG a emitir nel territoriu asturianu, pa lo que’l proyectu de llei indica que se pue efectuar «la emisión del serviciu públicu de comunicación audiovisual per ondes hertzianes terrestres d’una comunidá o ciudá autónoma n’otra limítrofe y con afinidaes llingüístiques y culturales siempre qu’asina lo alcuerden con un conveniu y exista reciprocidá».

Al tiempu, la norma sorraya la capacidá de les comunidaes autónomes pa supervisar y controlar les emisiones que se faigan dientro del so territoriu y dáse-yos «potestá sancionadora» pa que los medios audiovisuales «nun sobrepasen los sos respectivos límites territoriales».

Crítiques periodístiques

La Federación de Sindicatos de Periodistes (FeSP) ta convencida de que’l proyectu del Gobiernu ha ameyorase al entender que ta «influenciáu escesivamente polos operadores privaos» y qu’«atiende más a la lliberalización qu’a la regulación del sector». Esti argumentu refuérzase recordando que la Unión de Televisiones Comerciales Asociaes «aplaudió indisimuladamente» l’anteproyectu.

El recorte del papel de serviciu públicu que se supón a los medios de comunicación percíbelu la FeSP en cuestiones como que yá nun se fale d’esti conceptu, el de serviciu públicu, y se sustituya pol d’«interés xeneral». Igualmente, señálase que se fala siempre de «mercáu audiovisual» y que nun se mienta’l «derechu fundamental a la información de la ciudadanía». Amás, la Federación llamenta qu’esi serviciu ciudadanu qu’habíen cumplir los medios s’acute pa les canales de titularidá pública «a les que-yos imponen más obligaciones que derechos». La FeSP asegura que’l proyectu nun contempla unos medios públicos audiovisuales «fuertes, que garanticen un porcentaxe mayoritariu de producción interna, y con eso una garantía d’empléu estable».

Nel apartáu llaboral, una de les carencies que ve l’asociación de periodistes ye que nos concursos de llicencies nun se pidan compromisos de crear empléu estable y que la llei nun toque asuntos de derechos profesionales como los Estatutos de Redacción.

Los sindicatos UXT y CC OO sumáronse a les propuestes de modificación de la norma pa evitar que «la futura llei dexe en manes de los gobiernos autonómicos la decisión de privatizar o non les radios y televisiones públiques autonómiques». En consonancia coles crítiques periodístiques, estes dos centrales insisten en que los medios de comunicación «han tar al serviciu de la ciudadanía» y qu’han garantizar «el derechu a la información veraz, plural y relevante», una afirmación que sofiten colos mandaos que fai la Constitución española a esti respectu y la normativa europea. «Y esto nun va ser posible si la futura Llei Audiovisual deroga’l conceptu actual de Serviciu Públicu esencial». P’acabar, UXT y CC OO remarquen que, con esi proyectu «la pluralidá informativa y el mantenimientu de miles de puestos de trabayu tán en xuegu».

Deportes d’interés xeneral

Una de les novedaes de la llei ye la creación del Conseyu Estatal de Medios Audiovisuales, que va tener ente les sos funciones la ellaboración d’un catálugu bienal onde se recueyan «los acontecimientos d’interés xeneral pa la sociedá qu’han emitise per televisión n’abierto y con cobertura estatal».

Estos acontecimientos han escoyese nun catálogu predetermináu que se detalla na llei y que se refier esclusivamente a eventos deportivos, como les olimpiaes, la final de la Champions League, la Vuelta Ciclista a España, los grandes premios d’automovilismu que se celebren nel Estáu o les competiciones deportives que cuenten con dalguna subvención pública. Namás «escepcionalmente» y por mayoría de dos tercios, el Conseyu de Medios Audivisuales «pue incluír nel catálogu otros acontecimientos que considere d’interés xeneral pa la sociedá».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam