Votos: 18

• 1
• 2
• 3
• 4
• 5

LES NOTICIES.COM adelanta'l «spot» de la Campaña Informativa de Toponimia 2009 de Cultura

La Conseyería de Cultura y la Dirección Xeneral de Política Llingüística presentaron la Campaña Informativa de Toponimia del 2009 pa «impulsar la divulgación de la toponimia oficial», en palabres de Mercedes Álvarez, conseyera de Cultura. El spot que se va poner en televisión yá se pue ver a traviés de la web de LESNOTICIES.COM.

Esti anunciu va emitise pela televisión, nel cine y nes radios en formatu audiovisual y tamién va tener una versión en prensa. Con estos materiales quier informase a la población de los cambios toponímicos nos que los nomes oficializaos s'inclúin en situaciones normalizaes de comunicación: tanto n'ámbitos urbanos como rurales, a traviés de personaxes femeninos y masculinos y en boca de xente mozo y xente mayor. La emisión de los anuncios de televisión y radio va facese ente'l 25 de payares y el 7 de xineru del 2010 y la campaña de prensa va durar hasta'l 30 d'avientu. A la presentación de la campaña asistieron tamién ocho representantes de los últimos conceyos nos que s'aprobó la toponimia: Balmonte, Mieres, Cangues d'Onís, Sobrescobiu, Tameza, Degaña, Siero y Parres. Y ye que la campaña va llevase d'una manera más específica a estos conceyos, onde se van repartir folletos colos qu'informar a la ciudadanía de la recuperación y oficialización de los nomes autóctonos del so conceyu. Nes campañes territoriales, los folletos van distribuíse peles dependencies municipales, los locales hosteleros y comerciales y espacios sociales d'alcuentru. L'importe total de la campaña ye de 96.927 euros.

Mercedes Álvarez destacó na presentación «l'esfuerzu importante» del Gobiernu nos últimos años na recuperación de la toponimia, de magar s'aprobó en Bimenes, nel añu 2005, el primer decretu d'oficialización. Na actualidá tán aprobaos los decretos de más de la metá de los conceyos del país, un total de 40, y la Conseyería de Cultura y la Xunta Asesora de Toponimia trabayen nesti momentu con otros 21. En cuantes a los 17 que falten, según adelantó Consuelo Vega, directora xeneral de Política Llingüística, van «faciéndose reuniones y tamos viendo de qué manera vamos tratar el procesu».

Nesta actuación de recuperación de la toponimia, Mercedes Álvarez destacó la «participación tan amplia de los sectores implicaos, tanto a nivel d'espertos como d'asociaciones ciudadanes, la Xunta Asesora de Toponimia (XAT) y los conceyos». Nesti sen, Álvarez recordó que la XAT ta formada por espertos, la Universidá d'Uviéu y l'Academia de la Llingua Asturiana: «La XAT fai'l llabor d'investigación y los conceyos alleguen les sos propuestes a la población p'abriles al debate públicu», esplicó. Igualmente, la titular de Cultura incidió en que too esto faise col «compromisu y la voluntá de llegar a alcuerdos». Al empar, Álvarez apuntó que «los casos puntuales nos qu'hubo controversies son la escepción que confirma la salú del procesu».

Tocante al llabor de les alministraciones na difusión y adopción d'estos topónimos, na presentación de la campaña informóse de que la Conseyería d'Infraestructures va incluyendo la toponimia nueva na rotulación de les víes y carreteres nes que tienen competencia, un llabor nel que tamién tán implicaos los conceyos na so señalética, pa lo que cuenten col apoyu financieru de la Conseyería de Cultura. Amás, la toponimia aprobada tamién se ta incluyendo nos mapes oficiales d'Asturies.

Sobre la xeneralización del usu de los topónimos oficializaos nes alministraciones o nel Ente Públicu de Comunicación, Consuelo Vega señaló que se trabaya con tol Gobiernu asturianu, los conceyos y l'alministración estatal «pa qu'incorporen los nomes actualizaos». Nesti sen, la directora xeneral de Política Llingüística indicó que se ta en comunicación con órganos estatales como l'INE (Institutu Nacional d'Estadística) «pa solventar problemes técnicos, como l'adaptación de grafíes propies asturianes, y p'actualizar el nomenclátor». Al tiempu, Vega comentó que la RTPA tamién «va incorporando los topónimos oficializaos» y afirmó que dende la Conseyería tán en contactu colos medios pa que-yos llegue tola información actualizada sobre les denominaciones nueves.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam