Cultura

Les males noticies

MIGUEL RODRÍGUEZ MONTEAVARO. UVIÉU - 14/02/2012 A LES 12:27:54

Non, Berri Txarrak nun nos dio males nueves esti pasáu vienres 10 de febreru na céntrica y clasista sala Tribeca d’Uviéu. Tolo contrario: el conciertu que dieron los tres integrantes del grupu foi, quiciabes, ún de los meyores directos qu’hebo dientro del panorama punki y hardcoreta d’Asturies nestos últimos tiempos. Esti conxuntu vascu ta formáu por Gorka Urbizu (voz principal y guitarra), David González (baxu) y Galder Izagirre (batería) y ye, anguaño, el mayor representante del rock n’euskara. Con siete discos asoleyaos y dieciocho (sí, dieciocho) años tocando ensin parar per tol mundu, Berri Txarrak atópase, dende va un tiempín, nel picu de la fola de la so carrera musical y, según paez, nun piensen baxar d’ehí hasta dientro d’abondo.

La sala taba a reventar. Paecía qu’echaren a los neninos de pelo-cascu a manguerazos pa dexar pasu a les moces con pañuelos coloraos na cabeza y piercings nes narices y a los rapacetos con camises de cuadros y aros nes oreyes. Baille de disfraces, non: intercambéu d’estétiques y d’ideoloxíes. Nótase que’l públicu ta caliente cuando na actuación de los teloneros del artista principal de la nueche yá ta la xente cantando, faciendo pogos y blincando. Helltrip, los teloneros en cuestión, armáronse de valor y rompieron el xelu que separa l’escenariu de los coreadores oficiales de cantares. Los de Mieres ficieron en cuasi una hora d’intervención que, pa les 21.30, yá tuviéremos toos con ganes de musika y guda.

Baxó’l telón antes de que llegara’l tríu protagonista pa volver a abrise a los diez minutos mientres sonaba un tema de Radiohead. Toos desentumeciéndonos. La cortina que nos separaba diba esnalando y la música, progresivamente, diba ensordeciéndose. Empezó a sonar la guitarra. «Sugea suge». Ocho compases. Repetición y batería y baxu y toos nosotros yá dientro del conciertu. Asina de fácil. Primer tema, primer parada nel movimientu eléctricu del punk contemporaneu. Y como nun pue ser d’otra manera pa un grupu esmolecíu polo minoritario, al rematar la canción, la presentación nun foi otra qu'un «¡Buenes nueches, Uviéu!» [sic].

El conciertu nun nos dio nin tiempu a respirar: el baxu y el bombu de la batería perfectamente xuníos al soníu grave de la personal afinación de la guitarra foron una constante nes cuasi dos hores que duró l’espectáculu. Esto, amestao a los trés euros que costaba’l quintu de cerveza nel local, apurriónos a toos lo poco que nos faltaba pa nun recoldanos na barra del chigre y zampanos ente tola xente cantando les poques coses en vascu que fonéticamente fuimos deprendiendo polos discos d’esti y d’otros conxuntos.

Según diben avanzando los temes, más sensación daba de querer ser vascu. Berri Txarrak consiguió daqué bien difícil nestos tiempos que cuerren: foron quién a poner una llingua milenaria a la par de los idiomes de moda, nos que, tol mundu, anque nun tenga naide nin idea, chapurria les lletres namás entendiendo de primeres dos o tres palabres sueltes. La música nun tien fronteres y, como sabemos, les fales tampoco. «Oreka», «Izena, Izana, ezina», «Haria». Paecíemos Tarzán cantado n’eusquera, pero dábanos igual; el sentíu xeneral de les canciones (post-llectura de la traducción) nun ye complicáu de sacar.

Nel últimu corte hasta hebo collaboración asturiana: unos rapazos xubieron a les tables pa garrar el micro que-yos dexó’l baxista y berraron «Oihu». Salimos de la sala cola musiquina del cantar na cabeza y, como suel pasar, tardó delles hores en marchar y dexanos pensar un poco nel restu del universu.

Por cierto, dime cuenta d’una cosa el vienres. Llegué a esta conclusión namás rematar l’actuación: anque dende ellí lleguen males noticies, nun son peores que les d’equí y, bien sé que, cuando too caiga, tovía nos va quedar Euskal Herria. Guk musika maite dugu.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam