Economía

Les axencies de califiación rebaxen la nota de Grecia y Irlanda y revisen la d'Estaos Uníos

HÉCTOR M. PALACIO. UVIÉU - 14/07/2011 A LES 11:07:39

La axencia de calificación crediticia Fitch acaba de rebaxar el rating de Grecia a «CCC» dende «B+», lo que significa que pon al país helenu a un pasu de la quiebra, según la so escala de calificación. Esta axencia esplica esta rebaxa pola falta d'un completu programa de rescate, sumado a la incertidumbre sobre la participación de los inversores privaos. Fitch cree que Grecia necesita más ayuda pa poder facer un axuste fiscal y critica'l papel de los líderes europeos. Pero l'axencia tamién desconfía del axuste del Gobiernu helenu, sobre too no que respecta al so plan de privatizaciones.

Esti informe de Fitch vien a sumase a les calificaciones que fixo Moody's sobre Estaos Uníos, Irlanda, Italia. Esta axencia de calificación de riesgos rebaxó la calificación de la deuda d'Irlanda y Italia hasta asitiales nel «bonu basura», y anunció que ta revisando la deuda d'Estaos Uníos con y pue rebaxala pola posibilidá de que'l Congresu d'esti país nun llegue a un alcuerdu pa elevar el límite d'endeudamientu. Sicasí, esti país tien anguaños una nota de «AAA», que ye'l reconocimientu máximu pa facer frene a los pagos. La Casa Blanca y los republicanos tán en conversaciones bien intenses pa llograr xubir el techu del prestamu públicu que tien esti país autorizáu por llei, que ye de 14,29 millones de dólares, enantes del 2 d'agostu.

La Comisión Europea criticó la rebaxa del 'rating' d'Irlanda, y el so presidente Jose Manuel Durão Barroso calificó esta decisión como «incomprensible y cuestionable». Con esta yá son tres les veces que Bruseles critica a les axencies de calificación de deuda en poco más d'una selmana por facer un informe sobre un país européu. Durão cuestionó la independencia de les tres axencies que controlen el mercáu y la comisaria europea Viviane Reding, señaló qu'«Europa nun pue permitir que tres empreses privaes estaounidenses la destrocen».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam