Llingua

L’ALLA presenta’l diccionariu terminolóxicu en llinia TERMAST

04/02/2010 a les 15:00:00

L’Academia de la Llingua Asturiana (ALLA) presentaba’l 4 de febreru, nel hotel Principado, d’Uviéu, el diccionariu terminolóxicu en llinia TERMAST. Un proyectu que nació’l mes pasáu d’una iniciativa conxunta de l’ALLA, del colectivu Sofastur y del Colexu d’Inxenieros d’Informática.

TERMASTUR tien l’oxetivu de proponer elementos terminolóxicos nuevos en llingua asturiana «pa facer d’esti idioma una ferramienta afayadiza y útil», esplicó la presidenta de l’ALLA, Ana Cano. El proyectu pretende que sían les iniciatives individuales o grupales concretes les qu’apurran les sos propuestes pa dar solución a los posibles problemes terminolóxicos del asturianu en dellos ámbitos: económicos, nueves tecnoloxíes, medicina... Toles propuestes van tar al alcance de los usuarios y van ser ellos mesmos los que van da-y normalidá, de manera que, pasáu un tiempu, «l’ALLA va dir introduciéndolos dientro de los sos calces normativos», aseguró la presidenta de la institución académica asturiana.

Otra manera, na presentación de TERMAST, tamién intervinieron Xesús González, del colectivu Sofastur, y David Melendi, en representación del Colexu d’Inxenieros Informáticos. González na so intervención dixo que’l proyectu «ye dalgo mui importante porque acerca la llingua asturiana al mundu tecnolóxicu y asina, vamos espardir la llingua a otros ámbitos onde l’asturianu nun tien tanta presencia». Pela so parte, Melendi comentó que TERMASTUR da la oportunidá a los falantes «d’opinar sobre esos términos y decidir si tán o non d’alcuerdu»

D’otru llau, hai que dicir qu’esti primer volume, escritu por Guillermo Ovidio Villa Balbona y Fernanda Valdés Rodríguez, ta dedicáu a los términos básicos usaos nel llinguaxe del mundu económicu y de la empresa. Amás, Ana Cano dio anuncia de que’l segundu trabayu, dedicáu a la terminoloxía xurídica «yá ta mui avanzáu y nunos díes va tar n’ALLA». Al mesmu tiempu, la presidenta de l’ALLA adelantó qu’hai un tercer volume dedicáu a la Medicina «que ta nuna fase mui avanzada». Otra manera, al final de la presentación fíxose una demostración práctica del funcionamientu de la ferramienta TERMASTUR y que yá ta disponible na rede.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam