Sociedá

La XDLA destaca'l llabor del selmanariu LES NOTICIES na normalización del asturianu

REDACCIÓN. UVIÉU - 27/01/2012 A LES 10:57:55

La Xunta pola Defensa la Llingua Asturiana (XDLA) acaba d'espresar el so «fondu pesar» al dase a conocer la noticia de la desaparición de la edición en papel del selmanariu LES NOTICIES. La organización cívica de defensa de la llingua llamenta la pérdiga d’un mediu que califica como «cabecera emblemática de la información y el periodismu en llingua asturiana». «Foron 16 años y cásique 800 númberos onde pudimos ver per escrito reportaxes, informaciones, entrevistes y opiniones que facíen normal el tratamientu de los asuntos más variaos na nuestra llingua. Foron tamién años de creación y asentamientu d’un llinguaxe periodísticu modernu y versátil que ta valiendo de referencia nel procesu de normalización del idioma n’ámbitos diversos», indica la XDLA.

La organización afirma que'l prestixu y la visibilidá que se-y da a la llingua con proyectos como LES NOTICIES llega a tola sociedá. «La presencia continuada, a lo llargo de década y media, nos quioscos, chigres y biblioteques xeneró ente los llectores, y mesmamente ente los non llectores, una dinámica de normalidá na concepción del usu del idioma en nuevos rexistros. Esti llabor de munches persones y de munchos d’años nun se fixo en devanéu. Les contribuciones a la normalización de los medios de comunicación van siguir tando presentes nes formes nueves d’acceder a la información y al entretenimientu n’asturianu», señalen.

L'asociación referencial del movimientu de reivindicación recuerda qu'estos díes tán faciendo repasu y revisión del Llibru Blancu de la Normalización de 1996, que dedicaba un capítulu a los medios de comunicación. Poco depués d’aquella fecha aparecíen el selmanariu LES NOTICIES y dellos medios dixitales d’información nuna rede d’Internet que tovía taba nos primeros pasos: «15 años depués, como vemos, tán viviéndose tiempos mui difíciles pa los medios y pa otros sectores de la producción cultural n’asturianu. Polo tanto, ye un momentu bonu pa la reflexón sobre la misión y les formes de la información, la comunicación y l’entretenimientu y la so la difusión pal futuru».

Sicasí, añaden que too esto nun pue facenos escaecer la responsabilidá ineludible que, nestos tiempos, tienen los poderes y Alministraciones públiques. «Responsabilidá en cumplir les lleis y en respetar los derechos de la ciudadanía; derechos qu’incluyen l’accesu a la información de calidá en llingua asturiana. Y pa eso tienen qu’asegurar la supervivencia de los medios qu’usen l’idioma como llingua vehicular, y vincular y reforzar les ayudes a aquellos qu’amuesen el mayor compromisu normalizador col asturianu. El fracasu de les sos polítiques ye evidente», diz la XDLA. Amás, agradecen l’esfuerciu y el bon facer d’años a los profesionales que fixeron posible’l proyectu, y deseen suerte «na nueva etapa y nos proyectos nuevos».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam