Asturies

La Coordinadora Ecoloxista denuncia l'ampliación illegal de la cantera de Latores

30/07/2010 a les 13:56:05

La Coordinadora Ecoloxista d’Asturies va presentar recursu de reposición contra l'autorización del Principáu pa l'ampliación de la cantera de Latores que se tramitó en xunetu. La esplotación de caliza, que s'asitia en Cellagu (Uviéu) ocupa una superficie total de 273.710 m2. La última ampliación concedida foi publicada nel Bopa del 30 de payares de 1995. Los ecoloxistes denuncien qu'«una vez más, el Principáu tolera los incumplimientos ambientales continos de les canteres, nun sólo permite esta situación sinón qu'autoriza la ampliación ensin solventar estes irregularidaes, lo que supón un tratu de favor a les empreses qu'incumplen les normes de manera reiterada».

Les irregularidaes que destaquen son que la empresa Lafarge Áridos y Hormigones nun restauró nin llantó vexetación nes zones esplotaes, que «tan completamente degradaes». Tampoco'l métodu d'esplotación «nun favorez la reducción del impactu paisaxísticu» La visibilidá ye notable nel paisaxe a pesiar de tar xunto de la transitada Senda Verde a lo llargo d'unos 400 metros.

Amás, l'ampliación va afectar a la Reserva Natural Parcial de La Cueva de Las Caldas, a namás 234 metros, onde existen colonies inverniegues d'esperteyos de distintes especies. Dos d'elles tan dientro del Catálogo Regional de Especies Amenazadas de la Fauna Vertebrada. Nesti sen, tampoco esiste malla cinexética que protexa a los animales o personas d'entrar o cayer na esplotación.

La empresa nun ta cumpliendo les condiciones de protección del sistema hidrolóxicu que yá se-yos impusiera. Nun hai banzaos que recueyan y eviten la entrada d'agua de lluvia, les agües interiores tampoco son trataes y pueden filtrase a la capa freática. La Coordinadora Ecoloxista llama l'atención sobre un regatu cercanu nel que «resulta evidente que nun se recueye'l barru» que xenera la esplotación.

En cuantes a la protección del mediu atmosféricu, «nun se cumple nenguna de les condiciones que yá se-yos impusieren» porque les zones de tránsitu de vehículos tan ensin pavimentar, el material ta apiláu ensin protección, tando dalgunos fuera de la cantera. Esto fai que l'aire te enrededor enlleno de povisa. Nun hai llavador de ruedes pa que nun s'esparda'l material pela carretera y los llímites d'emisión pasen de previstos nel Decreto 99/1985 del Principáu d'Asturies. «A pesiar de la cercanía a dos viviendes, nun s'instaló nenguna medida amortiguadora de los ruidos».

Por too, la organización ecoloxista quier dexar claro que «nun se puede permitir que les empreses incumplan la normativa ambiental de manera contina, enrriba'l Principado les permita ampliar les instalaciones, porque amás de xenerar problemes ambientales, ye una clara discriminación coles industries estractives que cumplen cola norma».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam