Cultura

L'otru festival que pues topar en Lorient

14/08/2010 a les 12:31:14

¿Qué ye lo que vos quiero cuntar col títulu del "otru festival"? : lo que ficé hoi de nueche foi , ver conciertos ensin utilizar el pase que dexame entrar a tolos actos del festival gratis. Lo que me prestaria ye demostravos como se pué pasar un festival guapu , oyendo bona música ensin gastar un duru. Toles carpes tienen una programación musical , que fae que la música tea presente a toles hores durante estos diís de festival. Son munches les bandes moces y nun tan moces que aprovechen el festival pa intentar dase a conocer ente el públicu, tamién hay munchos músicos perconocios que yos presta tocar solos o con formaciones alternatives a les más conocies , que aprovechen el festival pa dexamos toa una serie de bonos conciertos.

Ayeri , entamé la nueche con esta idea na tiesta, y voi comentavos que ye de lo que pudi esfrutar. De primeres dirixime a la carpa d"Asturies, y ellí pudi oyer un duu de curdión y vigulin , perguapu , nun yera xente poco conocio, yerá el curdioneru del grupu bretón Startijenn (ún de los rapaces con más futuru , y presente de Bretaña) , xunto a un vigulineru que nun conocia y que nun baxaba el nivel músical del elementu más conociu del grupu. Durante tres cuartos de hora tocaren un repertoriu variau de musica de baille , que foi acompañau de una bona riestra de bailladores. A pesar de lo mozo de los músicos , dexaronmos un repertoriu enerxicu y con una interpretación impecable y enllena de "bayures " musicales , nes que destacaba el bon faer del curdioneru, con unes harmonies orixinales y cuidiaes, y unes improvisaciones del vigulineru bien trabayaes, que venien a damos la razón , a los que pensamos que puen facese coses actuales, nueves y prestoses ensin dexar de llau la tradición y respetando les estructures de temes baillables.

Depues dirixime a la Salle Carnot, territoriu de los baillaores "continuos" del festival , equí topais a xente que son como "derviches" , entren en trance col baille. Y son xente de toes les edaes que gasten tola nueche baillando al son de la música puramente tradicional. La música ye la fecha polos músicos tradicionales y les normes que suelen ser que tolo que se toque tea lo más apegao al más ranciu soniu tradicional ( lo de rancio nun tien nengun sentiu despectivu , aclarolo, pero si presta que topes nel festival un llugar onde pueas sentir la tradición na so forma más pura), y l"acompañamientu musical suel ser o bien voz , o duos de biniou- bombarda , curdión solista, clarinete solu, clarinete -biniou, y demás formaciones tradicionales de Bretaña. Diba a la Sala pa poder sentir a Thomas Moisson , un curdioneru mozu de Loriant, gran rapaz y meyor persona y curdioneru , que diba a romper un mitu dientru d"esti inalterable espaciu escenicu , y yerá por primera vez na hestoria de la más tradicional "fest noz" del festival , acompañase del bon faer del gaiteru asturianu Milio Martinez Argüelles, pa faer unes pieces de lo más tradicional del Morbihan ( departamentu del que Lorient ye el so centru y capital ) , tocaren xuntos unos andros, por primera vez cona presencia de la nuestra gaita na sala Carnot , reductu de la más pura tradición bretona. Foi una interpretación enllena de matices y bon  facer , onde quedó demostrao que los músicos asturianos tan al mesmu nivel , que los músicos más afamaos de otros llugares .

Depues diximé a la “Quai de la Bretagne “ , onde tuvi oyendo al grupu Skeduz, un grupu formau por xente d"otres formaciones famoses como “ Hamon- Martin Quintet”, “ Pennou Skoulm” y demas que con una instrumentación de : biniou, bateria, baxu, guitarra, bouzouki y bombarda, con intrumentistes afamos del pais como Nicolas Kemener, Ronan Pellen o Ewan Hamon, dexaron otru puntu de vista de la música fecha pal baille, prestosa , actual ensin dexar dellau la tradición, y averada a la instrumentación que suel usase n"Asturies , dexaronmos una muestra de como los instrumentos nun son “ irlandeses”, ni “escoceses” ni de nengun llau ( esto bien al tópicu d"Asturies de que si un grupu tien bouzouki y guitarra na so formación siempre suena a “ irlando-escocés”), too tien que ver col usu que-y deamos a los instrumentos , ensin escaecemos del posu de la tradición de ún , que ye lo verdaderamente importante.

Tornando pa casina, ( la “casina ye l"hotel onde toi durmiendo ) , dexeme cayer pela carpa d "Asturies, onde taben rematando la nueche el grupu “ Extramonio “ , grupu madrilanu que lleva munchos años polos escenarios , y nel que agora toca el baxu Alberto Tellez , asturianu d"Uvieo , y conociu del Ca Beleño, aparte de xente conocia como el gaiteru gallegu Santi Barral , y el guitarrista José Luis Dou , ente otra xente amigo. Agora faen música bretona , y son xente que suel tocar nes animaciones músicales de los chigres de Lorient, y nun lo faen ná mal , con un bombarda madrilanu que nun desmerez de la xente del pais , vigulín , gaita gallega , caxón , baxu y guitara , tuvieron animando a los incondicionales de la carpa d"Asturies. Equí acabó la nueche de baldre de Lorient, como podeis ver pude tase equí ensin gastar un duru , y esfrutando de guapos conciertos.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam