Llingua

L'asturianismu felicítase pol autu del Constitucional qu'avala l'usu de la llingua na Alministración

10/03/2010 a les 20:10:43

Nun dexen de surdir reacciones al autu dictáu pol Tribunal Constitucional (TC) el 8 de marzu pasáu, nel qu'avala la validez de la Llei d'Usu tocante a la posibilidá d'usar l'asturianu nes comunicaciones cola Alministración. La Xunta pola Defensa de la Llingua Asturiana (XDLA) calificó de «positivu» l'autu del tribunal y tresmitió la so felicitación al Aconceyamientu de Xuristes pol Asturianu (AXA), que foi quien respaldó'l casu nos tribunales.

La organización en defensa l'idioma considera «significativo» que'l Plenu d'esti tribunal, con un autu inapelable, «quiera poner fin a la dexadez y los determinos arbitrarios de les autoridaes asturianes na aplicación de les lleis que protexen los derechos fundamentales de los falantes d'asturianu». Al empar, la XDLA manifestó la so esperanza de qu'esta decisión «sía'l primer pasu pa la igualdá xurídica ente la ciudadanía, porque de momentu nun ta reconocida más que la posibilidá de dirixise n'asturianu a l'Alministración». Igualmente, el colectivu recuerda que «pa garantizar dafechu tolos derechos llingüísticos, l'ordenamientu xurídicu del Estáu yá conoz una fórmula que funciona n'otres comunidaes: la declaración d'oficialidá».

Otra manera, Unidá Nacionalista Asturiana (UNA) coincidió na valoración positiva del autu del TC, qu'a xuiciu de la organización «constitúi un pasu nel reconocimientu de los derechos llingüísticos de tola ciudadanía asturiana». De la mesma manera, UNA nagua «porque esti pronunciamientu suponga un cambiu nel tratamientu que, dende los poderes públicos, tán dando a la llingua asturiana y a los sos falantes».

Con too y con eso, UNA llamenta qu'esti reconocimientu tenga que venir «paradóxicamente» de fuera d'Asturies. Na opinión del partíu políticu esto ye «un síntoma nuevu del deficiente y noxentu tratamientu que vien sufriendo l'asturianu de los poderes públicos». Amás, la organización interpreta qu'esti autu «ye una prueba más de la necesidá del reconocimientu oficial de la llingua asturiana nel Estatutu d'Autonomía, dándo-y asina l'únicu estatus xurídicu que merez».

SUATEA tamién mostró la so satisfacción pol autu del TC, que supón pal sindicatu «una confirmación y afitamientu del camín andáu nel reconocimientu de los derechos fundamentales de la ciudadanía asturiana que nós incansablemente reivindicamos». Ún de los matices que fai la central al autu ye que s'estableza que la ciudadanía nun pueda escoyer la llingua na que se tramiten los espedientes y na que l'Alministración conteste. «Esta llingua va ser el castellanu, que ye la única llingua oficial n'Asturies y la Llei d'Usu nun regula que l'Alministración la tenga qu'emplear nes sos contestaciones y trámites», remarca SUATEA.

Esta situación xurídica «ye chocante y contradiz los principios básicos de la comunicación, cortesía y civilidá», comenta'l sindicatu, al dase'l casu de qu'una persona se dirixa a otru interlocutor nuna llingua determinada y ésti conteste n'otra. «Y más cuando esi interlocutor, l'Alministración, tien por función el serviciu a la ciudadanía», esplica la central.

Igualmente, SUATEA afirma que la Llei d'Usu «tampoco nun garantiza'l respetu de los derechos llingüísticos de la ciudadanía n'otros ámbitos distintos de l'Alministración, como los conceyos, la universidá, la educación o los medios de comunicación». Nesti sen, el sindicatu d'enseñanza incide na demanda de la oficialidá «pa garantizar los nuestros derechos llingüísticos en tolos ámbitos sociales».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam