Sociedá

L'arzobispu d'Uviéu manda rezar por Whitney Houston

REDACCIÓN. UVIÉU - 16/02/2012 A LES 12:16:41

L'arzobispu d'Uviéu, Jesús Sanz Montes, na carta pastoral selmanal más recién, recuerda'l fallecimientu de la cantante estaunidense Whitney Houston y anima a los fieles a rezar pol descansu eternu de la so alma. Sanz Montes fai referencia al contraste ente les semeyes de la cantante onde aparez cola «sonrisa glamurosa de daquién aparentemente feliz y afortunada» y «el visaxe de dolor, de desvaríu, de poliya, que los desamores, los infortunios, l'alcohol y la droga acabaron por dibuxar fatalmente». Por eso, el preláu católicu señala na so epístola que reza por ella y pide «pa que'l so alcuentru con Dios sía una estrena eterna cola guapura qu'enxamás mustia, nin traiciona, nin destrúi, sinón que cumple del too y pa siempre la felicidá pa la que tamién ella foi pensada, creada, esperada y redimida».

Nun testu d'un tonu poéticu mui marcáu, l'arzobispu d'Uviéu fai alcordanza de dellos cantares de Houston, onde atopa señes de la so busca vital y la so rellación con Dios, como en «How Will I Know?» ('¿Cómo diba poder conocer?'), sobre la que Sanz Montes diz que yera «lo que foi buscando a tientes», pero qu'hai daquién «mayor que les nuestres torpeces o estravíos que nos conoz y que sal a escontranos, ye l'Amor más grande de toos («Greatest Love Of All»), como ella tamién cantó».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam