Cultura

L'Arribada concede'l Premiu Timón a Roberto González-Quevedo

07/09/2010 a les 12:32:18

Los organizadores del alcuentru lliterariu xixonés L'Arribada alcordaron otorgar el IV Premiu Timón, p’autores en llingua asturiana y gallego-asturianu, al autor llionés Roberto González-Quevedo.

Esta distinción, que consiste nuna obra del escultor y ceramista xixonés Jesús Castañón, va entregase nun actu entamáu pal 23 de setiembre, a les 20 hores, nel Centru Municipal Integráu de L’Arena, en xixón, nel marcu d’actividaes de L’Arribada 2010. La entrega del gallardón va acompañase cola actuación del Cuarteto Antolín de la Fuente.

Los ganadores anteriores foron, nel 2007, Nené Losada Rico; nel 2008, Xuan Xosé Sánchez Vicente; y, nel 2009, Manuel García Galano. Anguaño, el xuráu taba compuestu por Alberto Álvarez Peña, Vicente García Oliva, Aurora García Rivas, Humberto Gonzali, Jorge Espina, Inaciu Iglesias y Xuan Xosé Sánchez Vicente.

Roberto González-Quevedo ye un escritor, filósofu, antropólogu y llingüísta nacíu en 1953 en Palacios del Sil (Llión). En 1981 algamó’l Premiu de Narraciones Curties de la Diputación d’Asturies (antecesor del Xosefa Xovellanos) col so rellatu Pul sendeiru la nueite. Ye miembru de númberu de l'Academia de la Llingua Asturiana y na actualidá ocupa'l cargu de secretariu y director de la revista Cultures, editada pola Academia de la Llingua Asturiana y dedicada a temes antropolóxicos y etnográficos.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam