Actualidá

Julio Anguita: «La clas política ye mansa y bebe de los bancos»

IVÁN G. FERNÁNDEZ . UVIÉU - 26/01/2012 A LES 15:17:12

La editorial El Páramo acaba de publicar l’últimu llibru del ex-coordinador xeneral d’IU, Combates de este tiempo, onde recueye artículos de prensa nos qu’adelantaba la situación de crisis económica y política que se diba vivir a nivel mundial. Anque yá nun ta na primer fila de la política, Julio Anguita asegura que nunca marchó d’ella, «anque nun tenga nengún cargu». Los escritos de Combates de este tiempo (Editorial El Paramo) reflexen les idees qu’habiten na mente y na palabra d’un home que foi un referente pa la esquierda nel Estáu español.

Combates de este tiempo ye una hemeroteca de los sos escritos qu’empieza nel añu 1977 y llega hasta güei. ¿Por qué se publica agora?
Publícolo agora porque me lo pidieron. Y pidiéronmelo porque, teniendo en cuenta los acontecimientos que tán asocedidendo como consecuencia de la política qu’emana de la Unión Europea, delles persones –ente elles los de la editorial El Páramo– recordaben les alvertencies qu’hai 18 o 20 años, cuando’l Tratáu de Maastricht, yá fixera IU sobre toes eses cuestiones. Aquellos análisis evidenciáronse como ciertos cuando se denunciaba l’europeísmu simplayu de los que s’embarcaron nun proyectu ensin ver qu’aquello diba señalando la política qu’actualmente se ta faciendo. A partir d’esi análisis yá se dixo que, como nesti discursu parez ser qu’hai unes llinies de fuercia y una determinada coherencia, por qué nun añadir los discursos que la van marcando al traviés de delles etapes: l’añu 1977, l’alcaldía de Córdoba, la Xunta d’Andalucía y España. Así qu’esi ye l’orixe del llibru.

Esos combates que lu llevaron a la política, ¿cree usté qu’agora son más gafos qu’antaño?
Parez que, nel fondu, nuna sociedá que ta en llucha –porque la llucha de clases existe, anque dellos combatientes tiraren la toballa, como ye’l casu de la esquierda–, los combates son los mesmos en tolos tiempos. El ponese nesta época creyendo que somos distintos ye una tontería. La verdá ye que sigue habiendo propietarios de medios de comunicación, trabayadores esplotaos, dominantes y dominaos como n’otros tiempos. Lo que pasa ye que nesta época añádese una crisis d’una gravedá ensin precedentes –parezme que ye muncho mayor que la del añu 1929– y too eso fai que teamos énte una necesidá imperiosa de lluchar, simplemente por pura sobrevivencia.

¿Realmente ve usté a la xente con gana de lluchar?
Non, non, nun lo veo. Aparte, tengo que dicir que les organizaciones que n’otros momentos foron la conciencia de los trabayadores y de la esquierda en xeneral, hai munchu tiempu que s’aggiornaron nel sistema. Pa entendenos: toi falando de los sindicatos y, sobre manera, de los dos mayoritarios. Amás, toi falando de les fuercies polítiques que s’autotitulen d’esquierda y qu’hai munchu tiempu asumieron los valores del sistema: mercáu, competitividá y crecimientu sosteníu. Por eso, nestos momentos hai una población –en concreto, n’España– qu’a toos estos problemes amiésta-y los sos atavismos, como’l mieu a pensar, que marcó muncho la vida política española a lo llargo de los dos últimos sieglos.

Ente eses fuercies de la esquierda, ¿tamién inclúi a IU?
Sí, a una parte d’IU, sí. Les crisis d’esta formación política –y que yo tuvi que vivir hai años– foron porque una parte d’ella, en concreto Nueva Izquierda, asumió’l discursu de Maastricht, de gregarismu alredor del PSOE y de defensa d’una política que nestos momentos demostróse que yera incorrecta. Too eso implica la crisis d’IU y el combate que s’instaló ellí.

Pues lleer la entrevista completa na edición impresa de LES NOTICIES.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam