Asturies

Jesús Iglesias: «Los llogros nel terrén de asturianu foron escasos»

13/05/2011 a les 10:09:03

IVÁN G. FERNÁNDEZ. IX-Los Verdes lleva cuasi dos llexislatures gobernando en xunto col PSOE, pero la coalición qu’encabeza Jesús Iglesias nun quier falar tovía de posibles pactos de gobiernu hasta depués del 22 de mayu. Amás, Iglesias asegura que pueden «demostrar la utilidá de los votos» que recibieron hai cuatro años, anque reconoz que los avances nel asturianu «foron escasos», a pesar de qu'IX ratifica'l so compromisu cola oficialidá.

A pocos díes del 22 de mayu lo que más se siente a los partíos ye eso del votu útil. Nesi sentíu, usté tien asegurao qu’IX «ye más necesario que nunca».
Yo tamién uso y reivindico’l votu útil de la esquierda pa IX y, amás, fáigolo diciendo que podemos demostrar la utilidá de los votos que recibimos hai cuatro años, cola nuestra presencia nel Gobiernu asturianu y colo que fiximos pa remediar les consecuencies de cómo se ta encarando la crisis coles decisiones que se tomen nel Gobiernu de la nación. Entiendo qu’estes decisiones n’Asturies tengan un correllatu automáticu y, de dalguna manera, nosotros actuemos como un colchón d’eses midíes. Por eso digo que somos más necesarios que nunca, porque nun parez qu’haya una voluntá d’acabar colos axustes, sinón tolo contrario. Parezme que cada selmana dase un pasu más y avánzase nuna propuesta nueva nesos axustes y decisiones que perxudiquen a la mayoría de la sociedá.

Una de les promeses electorales d’IX ye la intención d’aparar el proyectu de la macroincineradora de Serín pa la quema de residuos. ¿Esa intención va ser posible si se produz un Gobiernu en coalición, cuestión más que probable?
Nosotros fiximos una propuesta na Xunta Xeneral, enantes d’acabar la llexislatura, que nun llegó a cumplise porque’l proyectu namás empezó la tramitación. El nuestru proyectu proponía una política de tratamientu de los residuos que diba facer innecesariu’l proyectu d’esa planta d’incineración. Dende IX aspiramos a que la Xunta Xeneral sía una mayoría suficiente pa que los conteníos d’esi proyectu se puedan aprobar y d’esa manera s’alcuentre una solución al tratamientu de los residuos que permita paralizar la planta incineradora de Serín.

Ye verdá que ye mui ceo pa falar d’un posible Gobiernu de coalición, pero vuelvo a face-y la mesma pregunta.
Los Gobiernos de coalición decídelos la xente colos sos votos y estableciendo correllaciones de fuerces. Ta claro que’l nuestru programa electoral contempla esa propuesta de paralización de la planta de quema de basura y esperamos tener votos abondos pa qu’esa propuesta salga alantre. Pero hai que dicir tamién que la pelota ta nes manes del electoráu.

En cuantes al asturianu, ¿va cambiar en dalgo la llinia política que va desarrollar IX na llexislatura nueva? ¿Van presentase dalgunes novedaes?
Ratifico’l compromisu de la coalición IX-Los Verdes, como reflexa’l programa electoral, cola oficialidá del asturianu. Pero, al empar, dicimos que, ensin la oficialidá de la llingua asturiana, tamién se pueden facer otres coses. Nesta llexislatura reconocemos que los llogros foron escasos y yo cuasi lo llimitaría a la dignificación de la sé de l’Academia de la Llingua Asturiana y a dellos avances nel ámbitu toponímicu nos conceyos asturianos. Otra manera, sigue pendiente’l reconocimientu de la especialidá d’Asturianu na Enseñanza. Y tamién ta pendiente l’avance nel usu del asturianu nel ente públicu de televisión del Principáu y, a partir d’ehí, nos demás medios de comunicación, anque nun sían de titularidá pública, sinón privada. Parezme que per ehí hai tovía munchos pasos que dar y nesta llexislatura, pa bien ser, había que los dar.

¿Eso quier dicir qu’IX podía renunciar a la oficialidá?
Non, alcuérdese de que-y toi diciendo que ratificamos el compromisu cola oficialidá, pero dicimos que’l fechu de que nun hubiera oficialidá hasta agora nun ye sida pa que nun se fixeren otres coses.

Puedes lleer la entrevista completa na edición impresa de LES NOTICIES.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam