Asturies

Izquierda Xunida reafírmase nel asturianismu en Santalla

09/09/2010 a les 10:34:59

Izquierda Xunida-Los Verdes axuntáronse na Casa de la Cultura de Santalla d’Ozcos, xunto a la organización sociopolítica Lliberación, pa celebrar el Día d’Asturies. A esti actu reivindicativu acudió tamién Cayó Lara, coordinador federal d’Izquierda Unida nel Estáu, y una bona mano militantes y simpatizantes de les organizaciones d’esquierdes mentaes.

Jesús Iglesias, coordinador xeneral d’Izquierda Xunida d’Asturies, escomenzó afirmando que la so organización yera agora mesmo «tan asturianista como l’añu pasáu, tan asturianista como de va años, cuando nos comprometimos cola historia, la cultura y la llingua asturiana. Nós sabemos que los principales actores de la historia, la cultura y la llingua asturiana son les clases trabayadores y güei, día d’Asturies, insisto nel compromisu que llevamos faciendo patente de va años na defensa de les señes d’identidá . Siguimos y vamos siguir considerando que la tradición del asturianismu y de la esquierda ye beneficiosa pa los intereses de la nuestra sociedá».

Iglesias, otra manera, afirmó qu’existe una salida de la crisis económica pela esquierda y qu’ésta ye la única que pue beneficiar a la clas trabayadora. Preocupáu pola situación del sector mineru n’Asturies, esixó «una respuesta global a los problemes d’esti sector», que se siguiera considerando'l carbón como recursu enerxéticu estratéxicu y finalmente recordó que, si los planes de la UE d'esmantelamientu del sector salen alantre, «n’Asturies van perdese 7.000 puestos de trabayu directos y más de 14.000 indirectos». «Nun lo podemos permitir», esclamó. Tamién se refirió Iglesias a los recortes que’l Ministeriu de Fomentu inflixó a les autovíes asturianes, mostrándose mui preocupáu polos que sufrió’l tramu proyectáu ente Uviéu y La Espina. «Esta ye una infraestructura imprescindible pal rellanzamientu económicu del suroccidente d’Asturies», recordó. Tamién tuvo palabres pa les ralentizaciones que ta sufriendo l’Autovía del Cantábricu que, recordó, «yá dexaron en paru a 800 trabayadores».

José Uría, representante de Lliberación, mostróse satisfechu por tar en Santalla d’Ozcos, «parte del Occidente olvidáu d’un país olvidáu»; asina mesmo, mostró l’apoyu a Izquierda Unida por promover nel Gobiernu d’Asturies «polítiques sociales, culturales y llingüístiques». Otra manera, Joaquín Arce, coordinador de Los Verdes, sostuvo «qu’había que facer una reflexón sobre’l cambiu del modelu económicu» y qu’ellos introducíen nel debate «l’agricultura ecolóxica y un cambiu del modelu enerxéticu que tien que se traducir nel aforru y les enerxíes renovables».

Llamáu a «la fuelgona»
Otra manera, el coordinador federal d’Izquierda Unida, Cayo Lara, fixo un llamáu esti miércoles 8 de setiembre pa que’l próximu día 29 de setiembre haya «una fuelgona» («un huelgón», dixo él) , qu’obligue al Gobiernu a recomponer económicamente España. «Hai que dici-yos a los socialistes que per esi camín nun se va a niundes y empezar a caminar pola esquierda social», sorrayó. Lara fixo referencia al siguimientu de la fuelga xeneral francesa, convocada’l 7 de setiembre, y que foi del 70%, «siendo Francia un país cola metá de paru qu’España». Defendió que nel Estáu español hai munches más razones pa dir a la fuelga y qu’ensin dulda «el 29 de setiembre va paralizase’l país».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam