Cultura

IX-Los Verdes d'Uviéu y UNA critiquen «l'amiguismu» del Conceyu na programación de la zarzuela

05/03/2010 a les 14:02:17

El presupuestu que'l Conceyu d'Uviéu dedica a la zarzuela foi cuestionáu por IX-Los Verdes d'Uviéu y Unidá Nacionalista Asturiana (UNA)-Uviéu. Dambes dos organizaciones coincidieron en criticar los honorarios que va percibir l'actor Arturo Fernández nesti ciclu: «Va cobrar por unos pocos díes de trabayu lo mesmo qu'un mileurista en diez años», afirmó Alejandro Suárez, coordinador d'IX d'Uviéu. Nesti puntu, tanto la coalición d'esquierdes como UNA interpreten qu'existe un casu d'«amiguismu» ente l'actor y l'alcalde d'Uviéu, Gabino de Lorenzo.

El presupuestu pa l'Antoloxía de la Zarzuela programada esti branu ronda los 900.000 euros, una cifra que foi rebaxada depués con un recorte de 84.000 euros nos cachés de dellos artistes, lo qu'a xuiciu d'Alejandro Suárez ye «una cortina de fumu» que nun tien otru oxetivu qu'«ocultar los escandalosos honorarios del amiguismu de Gabino de Lorenzo y Arturo Fernández».

Al empar, IX-Los Verdes pregunta cómo se va distribuír el presupuestu depués de los recortes anunciaos y denuncia que la contratación d'intérpretes «llévase nel más estrictu secretismu, porque too respuende a los intereses creaos ente intermediarios y axentes artísticos», declaró Suárez.

Pa UNA ye «vergonzosa» la xestión del presupuestu del espectáculu de la zarzuela, «mentes se quiten fondos pa biblioteques o se practica una nula normalización de la llingua asturiana». UNA-Uviéu tamién espresó la so sorpresa por dellos caches y en concreto pol d'Arturo Fernández que, na opinión de la organización, ye esaxeráu «cuando'l paru nel conceyu bate récors». El partíu manifestó'l so desalcuerdu con «un espectáculu diseñáu a midida de Gabino de Lorenzo y al so círculu d'aficionaos a la opera qu'aporfia en repetir na ciudá resalvando la cultura asturiana».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam