Les Noticies.com. Diariu dixital. 04-02-2012
Israel pon en llibertá a l'activista catalana Ariadna Jové Martí
08/02/2010 a les 14:42:00El Tribunal Supremu (TS) d'Israel acaba d'ordenar la lliberación de l'activista catalana Ariadna Jové Martí y de la so compañera australiana Bridgette Chappell, a cambiu de pagar una multa de 3.000 shekels caúna (590 euros aproximadamente).
De la mesma manera, les autoridaes israelines alcordaron prohibir la entrada de les dos cooperantes en Cisxordania, según informaba la edición dixital del diariu Yediot Aharonoth.
La Corte Suprema d'Israel, amás, decretó que les dos activistes tienen que pidir, nun plazu de cinco díes, permisu alministrativu pa poder permanecer n'Israel. Poco enantes, la oficina del Fiscal del Estáu almitiera que la detención fora «totalmente inapropiada» por un problema sobre la xurisdicción de los inspectores de la unidá policial a onde les treslladaron.
Jové Martí y Chapell, pertenecientes al Movimientu de Solidaridá Internacional (ISM, poles sos sigles n'inglés), foron deteníes el 7 de febreru pasáu nuna operación del Exercitu israelín na ciudá de Ramallah –situada na llamada zona A, en Cisxordania–. Dambes activistes taben acusaes de permanecer en territoriu israelín de forma illegal. El TS d'Israel ordenó aparar el procesu de deportación y les dos muyeres permanecen a la espera de noticies nueves qu'aclarien el futuru de la so situación.
Según informa la organización Palestina Libre, la detención de les dos activistes «ye una violación directa» de los Alcuerdos d'Oslo ente Israel y l'Autoridá Palestina, que prohíbe, a les clares, cualquier invasión israelina nes árees A de Cisxordania que nun sía por motivos urxentes nin directamente rellacionaos cola seguranza.
L'arrestu de Jové Martí y Chappell produzse un mes depués de la detención illegal y deportación de la activista checa –tamién perteneciente al ISM– Eva Novakova, en circustancies aparecíes. Precisamente, la detención de Novakova desencadenó la controversía sobre los procedimientos illegales que la unidá d'inmigración Oz ta llevando alantre dientro de los territorios ocupaos ensin tener autoridá nenguna.
Comentarios fechos (10)
Otru 10/02/2010 a les 16:04:55
Equí, lo que molesta bramente ye que seya la xente que tien talentu asgaya, la que tien de colar lloñe o apodrecer equí, güeyando como esporpoyen combayones de toa mena. ¿Crear cultura, dices? ¡Anda ho, qu'esa escusa ya ta revenía enforma...! Una cultura elitista, caltenida a güelpe de subvenciones daes a deu. La cultura del amiguismu, que favorez de contino a los mesmos espabilaos (y demás familia) que lleven trenta años caleyando los invisibles y misteriosos atayos que xunen pela nueche la cai Gascona cola conseyería de cultura. Los mesmos que precuren, dende lo visiego, apandar a tol que nagua por aportar daqué nuevo a esti país vendíu al meyor xateru. Y esto nun ye namái patrimoniu de les cuenques, ye la realidá d'esta Asturies de güei. Y, a menos que seyas tú un d'esos "banduyos agradeciós", nun se porqué t'espantes y corcovies tan aína, énte d'ún de los munchos comentarios que per equí faense de cutiu.
unu 10/02/2010 a les 09:28:57
Polo menos esa reciella refalfiada que cuentes fai dalgo y polo que dices tien inquietúes culturales y sociales y la suerte de conseguir perres pa sacales alantre, polo que dalgo aporta. Quiciás no que son los conceyos mineros, colos sos fondos, había que mirar más p'arriba y cuestionar les fundaciones enrollaes y paralizaes, carreteres que queden medio vacies, megacampus universitarios pa cuatro gatos, empreses que nacen de la subvención y cierren con ella, etc. Igual eso son problemes más importantes y graves que la xente que realmente ta faciendo dalgo, contando coses y creando cultura. Anque tamién ye verdá que la cultura munches veces ye molesta...
Inxusticies nenyuri 09/02/2010 a les 17:54:02
Nos conceyos mineros lo qu'hai ye muncha reciella refalfiada, a la que nun-y falten perres en bolsu pa viaxar a "denunciar inxusticies" ayenes, escaeciendo les propies d'equí. Depués, cuandu tan fartos de correla, garren el carrerín qu'el pá o'l güelu ya s'encargarán de tresna-yos, per aciu la política municipal o rexonal, y a combayar cola xente serio que ye la que nesti país tien les llaves qu'abren les arques de les suvbenciones pa montar periódicos, dirixir cortos, montar discográfiques...
otra mocina 08/02/2010 a les 16:17:13
Diba ser muncho más guapo que la dexaren presa o con una bona multa, asina diba aprender de verdá que ta mui feo eso de denunciar les inxusticies. Hai xente, anque otra xente nun sía quien a creelo, quiciás por propia constitución interna, que ye quien a facer coses a cambiu de tener un mundu un poco meyor, que yá ye bastante.
Y establecer un xuiciu paralelu al d'Israel sobre una moza que nun sabemos qué aspiraciones profesionales o humanes dame que ye falar por falar.
Otru cantar y otru tema ye lo qu'haya nos conceyos mineros, que nun creo que tenga muncho que ver colo que pasa en Palestina.
Xuanchu 08/02/2010 a les 15:59:23
¡Hala, mui guapo! Yá tenemos anguaño otra mocina solidaria que dientro non muncho tará de conceyala o d'asesora. Eso sí, en nómina; que les coses de mayores son abondo más series y más cares. D'eso, nos conceyos mineros, tenemos asgaya.
26/01/2012 - Julio Anguita: «La clas política ye mansa y bebe de los bancos»
10/01/2012 - El PP balear, dividíu pol catalán como requisitu pa los funcionarios
05/01/2012 - Galicia convoca ayudes a la normalización díes depués del pieslle de 15 servicios locales
16/01/2012 - Llamazares propón acabar col «llimbu xurídicu» de la Casa Real
24/01/2012 - Les empreses siguen ensin usar el catalán a pesar de la llei
Esta web cuenta con una subvención de la Conseyería de Cultura y Deporte del Principáu d'Asturies
© Selmanariu LES NOTICIES y PUBLICACIONES ÁMBITU
Cai San Xuan 5, 3u derecha - 33003 - Uviéu
Tel. 985 204 601 - Fax. 985 221 537
Avisu Llegal -
Creitos -
Móvil
