Les Noticies.com. Diariu dixital. 04-02-2012
Israel pon en llibertá a l'activista catalana Ariadna Jové Martí
08/02/2010 a les 14:42:00El Tribunal Supremu (TS) d'Israel acaba d'ordenar la lliberación de l'activista catalana Ariadna Jové Martí y de la so compañera australiana Bridgette Chappell, a cambiu de pagar una multa de 3.000 shekels caúna (590 euros aproximadamente).
De la mesma manera, les autoridaes israelines alcordaron prohibir la entrada de les dos cooperantes en Cisxordania, según informaba la edición dixital del diariu Yediot Aharonoth.
La Corte Suprema d'Israel, amás, decretó que les dos activistes tienen que pidir, nun plazu de cinco díes, permisu alministrativu pa poder permanecer n'Israel. Poco enantes, la oficina del Fiscal del Estáu almitiera que la detención fora «totalmente inapropiada» por un problema sobre la xurisdicción de los inspectores de la unidá policial a onde les treslladaron.
Jové Martí y Chapell, pertenecientes al Movimientu de Solidaridá Internacional (ISM, poles sos sigles n'inglés), foron deteníes el 7 de febreru pasáu nuna operación del Exercitu israelín na ciudá de Ramallah –situada na llamada zona A, en Cisxordania–. Dambes activistes taben acusaes de permanecer en territoriu israelín de forma illegal. El TS d'Israel ordenó aparar el procesu de deportación y les dos muyeres permanecen a la espera de noticies nueves qu'aclarien el futuru de la so situación.
Según informa la organización Palestina Libre, la detención de les dos activistes «ye una violación directa» de los Alcuerdos d'Oslo ente Israel y l'Autoridá Palestina, que prohíbe, a les clares, cualquier invasión israelina nes árees A de Cisxordania que nun sía por motivos urxentes nin directamente rellacionaos cola seguranza.
L'arrestu de Jové Martí y Chappell produzse un mes depués de la detención illegal y deportación de la activista checa –tamién perteneciente al ISM– Eva Novakova, en circustancies aparecíes. Precisamente, la detención de Novakova desencadenó la controversía sobre los procedimientos illegales que la unidá d'inmigración Oz ta llevando alantre dientro de los territorios ocupaos ensin tener autoridá nenguna.
Comentarios fechos (10)
Litos Lernet 13/02/2010 a les 10:25:16
Too mui guapo.Trátase de falar, abultate que los palestinos pueden esperar a que'l tiempu dea la razón al que la tenga?
Menudu argumentu, nin, lucístete!!
Trátase de falar 11/02/2010 a les 13:40:02
Redxaronca:
Trátase d'eso, de poder dicir lo qu'ún camienta, lo que güeya al so ródiu, lo que-y presta y lo que non, como tú acabes de facer agora, llamando "talibanes" a los que piensen estremao a tí. ¿A que presta soltar lo que lleves en papu? Pues nun-yos ñegues esi drechu a los demás y dexa que seya'l tiempu el que-y dea la razón al que la tenga.
falarymasfalar 11/02/2010 a les 10:49:58
Redxaronca: Nun se puede falar mas alto y claro. Amás, los que piensen que cola cultura nun se puede mover conciencies tienen una vision muy perxudicial pa con ellos mesmos. Faime gracia cómo se compara alegremente un problema con otru, eso llamolo yo irresponsabilidá.
Redxaronca 11/02/2010 a les 10:28:09
Nun soi mui aficionada a facer comentarios nos foros, pero depués de lo que se ta diciendo nesti, la verdá, nun doi creditu!
Cómo se pue tener tán poco sensibilidá pa comparar lo que ta pasando en Palestina colos conceyos mineros? ¿Cómo se pue falar y criticar, gratuitamente, a unes mocer que tán trabayando, de baldre, pola lliberación d'un pueblu? Importa, a caso, les perres que tengan elles o les sos families. Ye meyor dir de vacaciones tolos branos pa Canaries, o qué guapo ye dir de viaxe per Europa colos colegües, o gastar los cuartos n'enfilase una fin de selmana sí y la otra tamién. Pero claro, cuando dalguién fae dalgo p'ayudar a los demás ensin recibir nada a cambiu, ye que ye un/a «pijo/a».Parézme que nun tenéis vergüenza nenguna. Qué ye que lo que pase fuera del país nun nos interesa? Hai que ciarrar los güeyos ente les inxusticies que nun tengan que ver con Asturies? Sois unos talibanes, porque lapidáis a la xente que nun piensa nin ye como vosotros. Xulgáis y obligáis a usar el burkha a tolos que contradicen les vuestres idees.
Como dicía l'otru: «Manda güevos».
Asina nos va, compañeros.
otrumás 11/02/2010 a les 09:59:32
Barrunto que si n'asturias y nas cuencas nun hubiera tanta politica munchos o morrían de fame o diban tener que trabayar de verdá, como trabayamos la mayoría de diez horas p' arriba frayando el tsumbu. Lo que ta pasando aquí col mundu de la cultura y la tsingua, y co las perras que tan pradiando ente cuatro, el dii que se prienda la tsuz va dexar fatos a los de Marbella y Valencia xuntos. De conciyu bable p´acá unos cuantos nun la baldaron má, y lo peor ye que asemeyanse a la familia real: xuntanse ente etsos y nun fain má qu'apurrir comeores al mundu de lo que etsos tsaman "cultura". Cultura desa haila asgaya en Siclia y perende....Lo que pasa que aende tsamase "MAFIA". Pero nun vos esmolgar que ná queda sapozao dafichu, y mas terde o mas tsuiu apruz too albintestate.
26/01/2012 - Julio Anguita: «La clas política ye mansa y bebe de los bancos»
10/01/2012 - El PP balear, dividíu pol catalán como requisitu pa los funcionarios
05/01/2012 - Galicia convoca ayudes a la normalización díes depués del pieslle de 15 servicios locales
16/01/2012 - Llamazares propón acabar col «llimbu xurídicu» de la Casa Real
24/01/2012 - Les empreses siguen ensin usar el catalán a pesar de la llei
Esta web cuenta con una subvención de la Conseyería de Cultura y Deporte del Principáu d'Asturies
© Selmanariu LES NOTICIES y PUBLICACIONES ÁMBITU
Cai San Xuan 5, 3u derecha - 33003 - Uviéu
Tel. 985 204 601 - Fax. 985 221 537
Avisu Llegal -
Creitos -
Móvil
