Economía

Industria invierte 2,7 millones n’empreses de les zones mineres

17/07/2010 a les 09:00:00

Un total de 42 proyectos asturianos van beneficiase nesti añu 2010 de la llinia nueva d’«ayudes acoyíes a Réxime de Minimis dirixíes a pequeños proyectos d’inversión xeneradores d’empléu nes comarques mineres». Estes ayudes vienen a complementar les actuaciones d’apoyu dirixíes al fomentu d’actuaciones empresariales nes comarques mineres y ponles en marcha’l Ministeriu d’Industria al traviés del Institutu pa la Reestructuración de la Minería del Carbón y Desarrollu Alternativu de les Comarques Mineres (IRMC) y que xestiona l’Instutu de Desarrolu Económicu del Principáu d’Asturies (IDEPA).

Les empreses beneficiaries van recibir un total 2.747.098, 95 euros, lo que supón una inversión de 9,5 millones d’euros y la creación de 84 puestos de trabayu nuevos. De los proyectos aprobaos, 27 concéntrense en conceyos mui mineros, con una subvención de 2,2 millones d’euros, una inversión de 6,3 millones y la creación de 55 empleos nuevos. Destaquen, sobre manera, los conceyos de Llangréu y Siero, con 7 proyectos caún. Amás, de los 42 proyectos aprobaos, 23 tienen porcentaxes de subvención superiores al 30 por cientu, y n’otros 14, presentaos por microempreses, l’ayuda alcanza’l 50 por cientu de la inversión total.

Según los datos provisionales comparativos col restu de les comunidaes autónomes beneficiaes nesta llinia d’ayudes, Asturies ye la comunidá con mayor númberu de proyectos aprobaos (29% del total) y, amás, la que representa mayor inversión aprobada (26% del total) y mayor empléu a crear (30% del total). L’IRMC habilitó esti añu 2010 una llinia d’ayudes nueva destinada a complementar toles actuaciones que sirvan d’apoyu y dirixíes al fomentu d’actuaciones empresariales na zona de les comarques mineres. Les ayudes van destinaes, fundamentalmente, a financiar iniciatives de tamañu pequeñu. Hasta la feha, según informen fontes del IDEPA, los programes d’ayudes empresariales a fondos mineros daben preferencia a los grandes proyectos empresariales y, amás, teníase en cuenta, sobre manera, cuál yera’l volume d’inversión y del empléu que se diba xenerar con esi proyectu.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam