Cultura

Inaciu Iglesias quíta-y la mázcara al nacionalismu en «Tu como yo»

02/08/2010 a les 18:43:21

Inaciu Iglesias quíta-y la mázcara al nacionalismu en «Tu como yo» Inaciu Iglesias (Uviéu, 1966), empresariu y articulista, acaba de publicar el llibru Tu como yo, un ensayu onde l’editor de LES NOTICIES somete a xuiciu les crítiques que, nos últimos años, vien recibiendo’l nacionalismu, sobre manera’l qu’asienta na defensa de les realidaes nacionales perifériques. En palabres del autor, lo que trató foi «de quita-y la mázcara al nacionalismu y resultó que la cara qu’hai debaxo ye más amable de lo que parecía». El volume, editáu por Trabe, pue adquirise hasta’l xueves 26 d’agostu, nos quioscos, col periódicu LES NOTICIES.

Con una prosa amena y clara, Inaciu Iglesias empieza esponiendo los xuicios negativos qu’escritores, pensadores o políticos, mayormente españoles, vienen publicando dende hai 30 años. Ente estos xuicios, Iglesias atopa qu’hai cinco razones constantes poles que se refuga’l nacionalismu: «Nel so nome mátase a xente; ye ficticiu, un inventu; ye cosa de psicópates; lleva munches enerxíes, y va facer que vivamos aislaos». Con paciencia, averándose al puntu de vista del otru y con sentíu del humor, l’autor va desmontando poco a poco estos prexuicios y dexando’l camín llimpiu pa preparar la defensa de la so tesis: que’l nacionalismu ye una ideoloxía válida pa participar nel xuegu democráticu.

Nel camín de desmontar los prexuicios colos que s’ataca al nacionalismu, Iglesias propón y esplica cinco claves «pa introducir racionalidá» nel debate: «El nacionalismu ye una ideoloxía más; ye una ideoloxía qu’hai que respetar; tien coses bones y males, como toes; nun hai que s’asustar pol nome, y necesita tiempu». Tiempu y paciencia, máxime n’Asturies, onde, según el parecer d’Iglesias, «la contradicción ente nacionalismu y anti-nacionalismu ye doblemente perversa, casi un bucle, pos siéntese falar mal del nacionalismu cuando la presencia política d’ésti ye mui pequeña y, pa contra él, aplíquense esquemes de fuera que tienen poco que ver cola realidá del país».

Preguntáu d’ónde surdió la necesidá d’escribir Tu como yo, Iglesias respuende que «del intentu d’esplicar el nacionalismu dende otru puntu de vista que nun sía’l de la condena pura y simple, namás que pol nome». Nesti sentíu, señala que’l llibru tien la intención non tanto de convencer como de dar que pensar. «Nun ye un tratáu onde analizar el nacionalismu por estenso, sinón que me centré nun puñáu de cuestiones concretes col aquel de pinchar al llector».

L’autor considera que ye un testu que pueden disfrutar tanto nacionalistes como non nacionalistes –o, inclusive, antinacionalistes– y ello porque «unos y otros van dase cuenta de que nun son tan diferentes: los que se definan como non nacionalistes van decatase de que sí lo son –anque d’otru tipu de nacionalismu– y los que se definen como nacionalistes, van ver cómo esta palabra tien un significáu más abiertu de lo que cuenten», apunta Iglesias.

En Tu como yo, Iglesias empéñase a fondu en conocer cuálos son los mecanismos y argumentos que s’usen pa echar del nacionalismu y demostrar que tales crítiques nun son aplicables esclusivamente a esta corriente de pensamientu. «Dizse que’l nacionalismu sitúa a los territorios y a los derechos colectivos perriba de los ciudadanos y los derechos individuales, pero lo mesmo se dicía hasta hai bien poco del socialismu, que situaba al Estáu o a les clases sociales perriba’l ciudadanu, o de los conservadores, que poníen la cuna, la familia o la relixón perriba de la llibertá personal», pon d’exemplu Iglesias.

Sangre y tierra Enantes d’acabar el llibru, l’autor usa una metáfora pa definir el nacionalismu que, a munchos, pue facer respigar de mieu: «El nacionalismu ye sangre y tierra», pero nesta imaxe’l sangre significa pa Iglesias «que tolos descendientes d’una determinada nacionalidá tengan derechu a caltener la so ciudadanía, vivan onde vivan y nacieren onde nacieren» y la tierra, «que tolos residentes nun territoriu, nacieren onde nacieren, dispongan d’unos derechos esenciales de residencia y ciudadanía». Dicho d’otra manera: «respetu a los antepasaos y complicidá colos nuestros vecinos» ye lo que, na opinión del autor, identifica y singulariza al nacionalismu. «En definitiva, sangre y tierra», conclúi.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam