Actualidá

Haidar: «Ye un trunfu de la xusticia internacional y de la causa saharaui»

18/12/2009 a les 14:10:00

Aminetu Haidar ta yá en L'Ayún cola so familia. Na nueche del xueves 17 acabaron 32 díes de fuelga de fame nel aeropuertu de Lanzarote reivindicando que-y dexaren volver a la capital del Sáhara Occidental, d'onde la espulsaren les autoridaes marroquines el pasáu 14 de payares. «Esto ye un trunfu. Una victoria del derechu internacional, de los derechos humanos, de la xusticia internacional y de la causa saharaui», aseguró Aminetu Haidar, a la puerta del hospital onde ingresara a cuenta de los males que tenía depués d'un ayunu tan llargu.

El Gobiernu español mandó un avión a Lanzarote na nueche del xueves 17 pa llevar a Haidar nun vuelu directu a L'Ayún. Ellí llego na madrugada d'esti vienres, onde la aguardaba la familia. La vuelta d'Aminetu Haidar llegó depués de les negociaciones manteníes ente los gobiernos del Estáu español, el francés y EE UU con Marruecos.

Una y bones s'iguó'l conflictu, el ministru d'Esteriores español, Miguel Ángel Moratinos, reconoció que Marruecos avisara de la espulsión de l'activista. El so homólogu marroquín, Taieb Fassi Fihri, llamáralu pa informalu de que diben espulsar a Aminetu Haidar de L'Ayún, onde taba detenida. Moratinos calificó la espulsión de «política y non alministrativa». El mandatariu español aseguró que naquel momentu espresó al homólogu marroquín la so «oposición y condena» a esti determín. El réxime lideráu pol rei Mohamed VI xustificó l'alcuerdu porque l'activista negárase a poner la nacionalidá marroquina na ficha del control policial, depués de que-y requisaren el pasaporte.

Interior permitió la entrada nel Estáu español d'Aminetu Haidar porque, anque la defensora de los derechos humanos nun traía pasaporte, lo que podía ser motivu pa nega-y l'accesu, comprobóse que llevaba la tarxeta d'identidá d'estranxeru en vigor, qu'acreitaba la so condición de residente llegal nel Estáu.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam