Les Noticies.com. Diariu dixital. 17-05-2012
El Gobiernu rebaxa un 40% el presupuestu de l'ALLA y «pon en peligru a la institución y el procesu de normalización»
DAMIÁN BARREIRO. UVIÉU - 14/02/2012 A LES 13:24:13«Tamos énte ún de los fechos más graves dende que l'Academia se creó». Asina de contundente se mostró Ana Cano, presidenta de l'Academia de la Llingua Asturiana (ALLA) –a la qu’acompañaben nueve académicos de númberu–, na rueda de prensa onde la institución treslladó a la opinión pública que'l Gobiernu asturianu acaba de recortar un 41,6% el presupuestu de l'ALLA –el del 2012, que la Xunta Xeneral refugó, prevía un 27% menos–. Van ser 93.000 euros menos que nel 2011, «colos que l'Academia nun pue facer frente a les funciones pa les que foi creada, de manera que se pon en gravísimu peligru'l procesu de normalización y de recuperación llingüística que se vien llevando alantre n'Asturies a lo llargo de más d'un cuartu de sieglu».
L'Alministración va destinar a la institución pa esti añu 134.320 euros, una partida cola que l'ALLA tien que facer frente a cuatro trabayadores, 24 colecciones llingüístico-filolóxiques, la organización del Día de les Lletres Asturianes, les Xornaes Internacionales d'Estudiu y los gastos académicos y de personal de la Universidá Asturiana de Branu (UABRA), amás de publicaciones co-financiaes xunto a otres instituciones que yá tán n'imprenta. Según Cano, el sueldu de los cuatro trabayadores, «que son sagraos», y el personal de llimpieza de la sé de l'ALLA yá supón cuasi 120.000 euros, «colo que queden 16.000 pa les demás actividaes, y entamar el Día de les Lletres nel 2011 yá tuvo un costu de 15.000 euros».
Por too ello, l'Academia mandó una carta al presidente d'Asturies, «pa que rectifique una decisión tan grave pal futuru de la llingua asturiana», y a les demás fuercies parllamentaries, «pa que faigan lo posible por reconducir una decisión oxetivamente tan negativa y dañible pa la llingua y cultura d'Asturies». Cano recordó que yá intentó falar en delles ocasiones con Francisco Álvarez-Cascos y nun lo consiguió y que'l trabayu de l'ALLA nun deriva de decisiones coxunturales de la institución, «sinón pol mandáu estatutariu fixáu pol organismu preautonómicu que se resume nel llabor normalizador, d'investigación, divulgación y tutela de los derechos llingüísticos». Otra manera, Ana Cano afirmó que dende'l Gobiernu y la Conseyería de Cultura «fartucáronse» de dicir que diben tener ente les sos prioridaes la cuestión llingüística y les señes d'identidá d'Asturies, «polo que nun entiendo como esto se pue tresllucir nesta rebaxa presupuestaria».
Comentarios fechos (31)
Falo 23/02/2012 a les 22:34:19
Cabornu, fíu, nun toos somos tan llistos como tú. Por otru llau ye propio de los fatos ver solo el árbol y nun ver la viesca. Si l' único que sabes aportar o comentar de lo escrito pelos demás ye'l detallucu, o la controversia semántica, entós ye que pocu ties que dicir. La noticia diba sobre les sovenciones a l'Academia de la Llingua y salístenos gramáticu, igual tienen que ponete un tayuelu ellí pa que añeres enforma, pontifiques y señalesnos les taches a toos, eso sí, ensin capacidá pa dir al fondu la cuestión, eso queda palos que somos fatinos.
Argañosín 17/02/2012 a les 12:13:56
Pero Uvieín del alma, si tan amigu yes de la democracia yá me dirás qué tendría de democrático una institución pagada por toos a la qu'un gobiernu escoyíu democráticamente nun-y pudiera dicir nada. ¿O tu tamién yes partidariu del funcionamientu del Niemeyer, onde'l gobiernu pagaba too y depués nun tenía capacidá de decidir? Pero ye que tas enquivocáu, mante: l'ALLA nun la creó Dios el séptimu día, l'ALLA creóla un decretu del gobiernu autónomu asturianu y otru decretu podría borrala d'un plumazu. A ver si t'enteres bien de les lleis que rixen el país nel que vives.
Uvieín 16/02/2012 a les 21:01:42
El tíu Paco lo que va ye a metese una fostia de narices nes eleiciones vinientes por pasase de gayu, asina qu'ande con cuidáu. Y por ciertu, fasta onde yo sé l'ALLA, índa dependiente del Gobiernu, tien plena autonomía como institución (como lo pueda tener la Universidá) y nun ye'l carcamal gobernante de turnu quien quita nin pon nada, que tovía tamos nuna democracia; la dictadura, anque cada día más cerca, tovía nun aportó ho. Más nada, y dende equí el mió sofitu a l'Academia, una institución seria, non como los filologuinos de caleya que pululen per esti foru y que vese que tienen unes cuantes espines clavaes en ciertos sitios por motivos dellos. Si resquema, que resqueme.
Mileurista 16/02/2012 a les 20:39:58
ablucáu, cola to corrección de les cantidaes nun fai falta que te respuenda a eso, tu mesmo acabes de ver qu'ehí falla algo. O esta xente tien un sueldu desaxeráu o tán contándonos un cuentu, y yá sabemos qu'estos de cuentos saben muncho. Lo de pa ónde teníen que dir esos fondos, home, los carteles de les carreteres sí son de Fomento, Obres Públiques o como vaya eso, pero hai más tipos de señalización nesti país que los de les carreteres. Nun fai falta que te diga qu'hai subvenciones xestionaes por Política Llingüística pa que les instituciones cambien cartelería, etc.
Nuberín del alma, nun quieres ver el problema, así que nun paga la pena siguir insistiendo. Pero home, si tas tan esmolecíu poles normes y l'Academia podíes escribir más curioso ¿Pa qué val l'Academia si los sos defensores son los primeros qu'incumplen les normes?
Daviz 16/02/2012 a les 11:59:04
¡Llingua asturiana descanse en paz!
Lesnoticies.com - El Gobiernu rebaxa un 40% el presupuestu de l'ALLA y «pon en peligru a la institución y el procesu de normalización»
Imaxe de la rueda de prensa.
15/05/2012 - El Festival Internacional de Cine dexa d'usar la forma «Xixón» nel logotipu
26/04/2012 - La Vuelta Ciclista a Asturies va usar la toponimia oficial
30/04/2012 - «Tenemos el retu de convencer a la sociedá de que l'asturianu paga la pena»
03/05/2012 - La XDLA llama a manifestase esti vienres 4 de mayu, Día de les Lletres Asturianes
19/04/2012 - La XDLLA convoca pal 4 de mayu la manifestación pola oficialidá
Esta web cuenta con una subvención de la Conseyería de Cultura y Deporte del Principáu d'Asturies
© Diariu LES NOTICIES y PUBLICACIONES ÁMBITU
Cai San Xuan 5, 3u derecha - 33003 - Uviéu
Tel. 985 204 601 - Fax. 985 221 537
Avisu Llegal -
Creitos -
Móvil
