Asturies

El Gobiernu va pidir al Ministeriu d'Educación un informe sobre la especialidá d'Asturianu

04/03/2010 a les 14:59:07

Esti xueves 4 de marzu, la FSA y IX-Bloque-Los Verdes xuntáronse pa facer una valoración sobre'l grau de siguimientu del pautu de Gobiernu. Ente otres cuestiones, falóse de la política llingüística, un área onde, según Jesús Iglesias, coordinador xeneral d'IX, fíxose un balance «más positivu nunos aspectos que n'otros». Al empar, el líder de la coalición d'esquierdes aprovechó p'anunciar que se diba pidir a la subsecretaría del Ministeriu d'Educación un informe del que tuvo conocimientu l'Executivu qu'existía nesi departamentu y nel que se traten les posibilidaes de crear la especialidá de Llingua Asturiana na educación.

Tamién nel apartáu de política llingüística, Iglesias destacó que se fixo un análisis positivu de los avances na creación y el mantenimientu de los Servicios de Normalización Llingüística (SNL) nos conceyos y que se sigue progresando nel marcu de les rellaciones cola Academia de la Llingua Asturiana.

«Estabilidá y compromisu»
Nun ámbitu más xeneral, los socios de Gobiernu coincidieron en remarcar la vitalidá del pactu, faciendo referencia fundamentalmente a la estabilidá que dio'l formar un Executivu de coalición y nes polítiques «comprometíes en dar respuesta a les necesidaes y los problemes de la ciudadanía», en palabres de Jesús Iglesias. En representación d'IX-Bloque-Los Verdes, el coordinador de la coalición d'esquierdes espresó la «satisfacción» por cuestiones algamaes nel Gobiernu, como «la consolidación del Salariu Social» o que s'enancharen les posibilidaes de que la ciudadanía compre una vivienda «al facese nestos meses que tres cuartes partes de les viviendes disponibles tengan dalgún tipu de protección».

La solidaridá foi otru de los elementos sobre los que se llamó l'atención, tal como espunxo Jesús Iglesias, que fixo una comparanza cola xestión del Gobiernu popular de Madrid: «Esti Gobiernu, con cuatro veces más cantidá de recursos qu'Asturies, fai seis veces menos esfuerzu en solidaridá nel presupuestu». Al empar, el coordinador d'IX apuntó que na reunión manifestóse la necesidá d'impulsar dellos aspectos del pactu «como los medioambientales, pa que tengan un desenvolvimientu mayor del que tuvieron hasta agora».

En nome de la FSA faló'l so secretariu xeneral, Javier Fernández, que coincidió n'espresar la satisfacción de la so organización pola estabilidá que'l pactu dio al Gobiernu y incidió en qu'en materia económica «demostremos fiabilidá y que somos un gobiernu progresista y d'esquierdes nel apoyu a los sectores más desfavorecíos». Pela so parte, Vicente Álvarez Areces, presidente del Gobiernu, amestó qu'«anque ye evidente que toos queremos que'l pactu se desarrolle al cien por cien, constatamos un altu nivel de cumplimientu».

Otra manera, Álvarez Areces aseguró que'l 2010 «diba ser un añu decisivu», énte'l que mostró'l so enfotu nes posibilidaes de futuru y en qu'Asturies saliera d'esta situación «con esperanza».

Delles de les decisiones que se tomaron nesta reunión tocante a la política económica y l'empléu foron consiguir que nel primer semestre d'esti añu tolos proyectos correspondientes al Plan A tean llicitaos, lo que según los socios de Gobiernu va xenerar empléu de manera inmediata, y tamién s'avanzó que na seronda va ponese en marcha la segunda fase del Plan d'Empléu Autonómicu.

Discrepancies
Tocante a les discrepancies ente los socios de gobiernu en materies como'l proyectu de construír una incineradora, Javier Fernández recordó que ye un aspectu que nun ta nel alcuerdu, anque reconoció que ye una diferencia «conocida y que se mantién». El secretariu xeneral de la FSA adelantó que la so organización solicitara un informe a Coxersa con un plan de futuru: «Cuando Coxersa presente esi plan la FSA va pidi-y que lu apruebe y lu execute, lo que nun impide que nel futuru haya una llei de residuos urbanos».

Álvarez Areces amestó que'l tema del reciclaxe sí que taba nel alcuerdu y que nesti puntu hubo una «valoración xeneral positiva, anque siempre queramos avanzar más». Con too y con eso, el presidente asturianu quixo aclariar que se ta «en plazu» pa dar soluciones al tema de residuos enantes de que s'agote'l vertederu.

Dende IX-Bloque-Los Verdes, Iglesias recordó que siguen «manifestándose en contra del sistema d'incineración» y señaló que na reunión «insistimos en qu'hai qu'aumentar la reducción, el reciclaxe y la reutilización de residuos, un puntu que sí ta nel pactu, sobre manera no que ye la materia orgánico, que nun se ta faciendo». Sicasí, Iglesias concluyó que no que ye la incineración «salimos de la reunión como entramos».

No que sí coincidieron los socios de Gobiernu foi en que les discrepancies «nun afecten a la estabilidá del pautu de Gobiernu», comentó Javier Fernández. Estes palabres refrendóles Álvarez Areces, que dixo que nel Executivu «hai bona convivencia y el convencimientu de qu'hai que xuntase pa salir de la crisis», mentes qu'Iglesias declaró que «l'alcuerdu va dexar de ser útil cuando dexe de valir pa iguar los problemes de la ciudadanía».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam