Asturies

El Gobiernu fai alcordanza de Nené Losada nos actos institucionales del 8 de marzu

09/03/2010 a les 12:15:59

Dos valdesanes «mui especiales», en palabres de Vicente Álvarez Areces, presidente del Gobiernu asturianu, tuvieron un papel destacáu na celebración institucional del Día Internacional de les Muyeres: la científica Margarita Salas y la escritora Nené Losada, fallecida'l mes d'abril del añu pasáu.

Nené Losada «representa a una xeneración de muyeres que toparon munchos pilancos nel so camín pal so desarrollu personal y profesional pero que, a pesar de les circunstancies, foron quien a superar les dificultaes», afirmó Álvarez Areces. El presidente recitó ún de los sos poemes, n'asturianu, pa esplicitar «esta necesidá de dir más allá de lo establecío». «L.libre como un páxaru», del llibru Entre apigarzos (1997) foron los versos que se pudieron sentir nel auditoriu del Conservatoriu Profesional del Occidente d'Asturies, en L.luarca.

Nel casu de Margarita Salas, bioquímica del Conseyu Superior d'Investigaciones Científiques, tuvo una intervención por videoconferencia na que faló sobre les dificultaes de les muyeres pa trabayar nel ámbitu científicu, mentes qu'Álvarez Areces presentó a la investigadora como un «referente internacional nel so campu, poniendo nel mapa científicu Asturies y Valdés».

Otra manera, el primer recuerdu del líder del Executivu asturianu nel 8 de marzu foi pa Isabel Larriet, la primera víctma de la violencia machista nel 2010 que'l 28 de febreru foi asesinada n'Uviéu pola so pareya. Álvarez Areces calificó esti fechu como la «manifestación más estrema de la desigualdá ente homes y muyeres».

Nel actu tamién se fixo referencia al centenariu que se cumple esti añu desque se permitiera l'accesu llibre de les muyeres a la Universidá y a la creación, va diez años, del Institutu Asturianu de la Muyer. «Con esti xestu, dende'l Gobiernu del Principáu queríemos dexar claro que, dende esi mesmu momentu, la llucha pola igualdá ente homes y muyeres diba ser un asuntu prioritariu nes nuestres polítiques», indicó Álvarez Areces.

Escuela d'Emprendedores y empresaries. La persistencia d'estereotipos que ponen a les muyeres en desventaya colos homes, lleva a que l'Executivu, señaló'l presidente, «siga proyectando iniciatives que contribuyan a enanchar les capacidaes de lideratu de les muyeres, como la Escuela d'Emprendedores y Empresaries d'Asturies, una iniciativa cola que la Ministra d'Igualdá se comprometió a collaborar dende'l so recién creáu Ministeriu cuando visitó Asturies la primer vez». Esta infraestructura configúrase como un serviciu especializáu pa la creación d'empreses lideraes por muyeres y pa consolidar les iniciatives empresariales encabezaes por muyeres. «Una referencia, en definitiva, pa cualquier asturiana que quiera llevar alantre la so idea empresarial y una idea cola que vamos a ayudar al desenvolvimientu de la Llei d'Igualdá», remarcó Álvarez Areces.

Llei d'Igualdá n'Asturies. Tocante a la normativa rellacionada cola igualdá ente sexos, el presidente del Gobiernu emponderó la Llei Integral de Violencia de Xéneru y la Llei d'Igualdá aprobaes pol Executivu español. Nesti últimu puntu, Álvarez Areces anunció la intención del Gobiernu de qu'esti añu la Xunta Xeneral dea'l preste a la Llei Asturiana d'Igualdá: «Una llei que queremos que naza col mayor consensu posible y que nos va permitir concretar los principios y conteníos de la Llei Estatal nel ámbitu de les nuestres competencies».

Al empar, dende'l Gobiernu espresóse la intención d'apoyar tolos cambios llegales que faigan falta «pa garantizar más derechos a les muyeres», en palabres d'Álvarez Areces, como ye'l casu de la Llei de Reproducción Sexual y Reproductiva y de la Interrupción Voluntaria del Embarazu, aprobada'l 24 de febreru pasáu y que va entrar en vigor esti branu.

Nesti contestu enmárcase'l lema de la celebración d'esti 8 de marzu, un artículu de la Carta Europea pa la Igualdá ente Muyeres y Homes onde s'afirma que «la sociedá democrática nun se pue permitir inorar la capacidá, los conocimientos, la esperiencia y la creatividá de les muyeres». La campaña combina esti mensaxe que revaloriza'l papel de les muyeres cola imaxe gráfica d'un botón play, que ye una invitación simbólica a que la sociedá actúe, pa impulsar el trabayu de los poderes públicos y p'algamar un compromisu ciudadanu mayor na llucha pola igualdá ente muyeres y homes.

Dende la ciencia y la educación. Otres intervenciones que se pudieron sentir en L.luarca foron les de María Berdasco, investigadora científica especializada n'Oncoloxía Molecular del Institutu d'Investigación Biomédica de Bellvitge (Barcelona); José Ignacio Nieto, director del IES Carmen y Severo Ochoa de L.luarca; y Elena Badallo, coordinadora del Área Sanitaria I. Los actos clausuráronse coles actuaciones de dos alumnes del Conservatoriu de L.luarca, de Mari Luz Cristóbal Caunedo y el grupu Delagua. Al final, toes elles fixeron una interpretación conxunta.

El 8 a les 8. La celebración institucional del Día Internacional de les Muyeres treslladóse pela tarde a La Llaboral, onde s'entamó l'alcuentru El 8 a les 8. Ellí, la directora del Institutu Asturianu de la Muyer, María Campomanes, fixo de presentadora de les actividaes programaes, ente les que s'alcontraba la charla de la periodista y creadora del portal Mujeres en Red, Monserrat Boix.

La periodista incidió na importancia d'usar el software llibre na rede, pola posibilidá que da d'usar un llinguaxe non sexista, al contrario que los programes privaos qu'avecen a caracterizase pol llinguaxe sexista o l'usu del masculín xenéricu. Al empar, Boix animó a la xente a crear el so propiu perfil na web, de manera qu'ésti nun quede en manes de los controles esternos d'Internet o de que'l buscador Google determine qué ye o nun ye importante nos conteníos acerca de la propia persona.

P'algamar estos oxetivos, la creadora de Mujeres en Red emponderó les posibilidaes de comunicación directa que dan los blogs, una modalidá d'espresión na rede na qu'entá ye escasa la presencia de les muyeres. Nesti sen, Boix remarcó que María Campomanes yera la única directora d'un Institutu de la Muyer que contaba con ún d'estos espacios, anque recordó-y que «debía» una entrada sobre la so asistencia al cumal de la ONU celebráu en Nueva York Beijing+15 la selmana pasada.

Otra de les reflexones que se fixo nel debate sobre la presencia de les muyeres n'Internet ye cómo éstes participen d'una manera más activa en redes como Facebook, onde primen les rellaciones d'amistá, la cercanía y lo privao, mentes se retráin en mayor midida de participar n'otros formatos, como'l de los blogs, onde les intervenciones tienen un carácter más públicu o formal.

La celebración clausuróse con una sesión musical a cargu de tres moces djs, anque la encargada de poner los primeros cantares foi la propia directora del IAM, María Campomanes.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam