Les Noticies.com. Diariu dixital. 17-05-2012
Gobiernu y ecoloxistes discuten poles cifres de contaminación n’Avilés
REDACCIÓN. UVIÉU - 13/01/2012 A LES 11:15:44La Dirección Xeneral de Mediu Ambiente d’Asturies salió al pasu de les denuncies feches pol Colectivu Ecoloxista d’Avilés onde esplicaba que’l nivel de la contaminación por bencenu aumentara camín del 50% nesti añu pasáu en comparanza col anterior. Según espliquen los responsables de Mediu Ambiente nun comunicáu, la contaminación atmosférica n’Asturies ta dientro de los topes marcaos pola llei y el nivel de bencenu recoyío en Llaranes (Avilés), aumentó’l 32% nel últimu añu.
Mediu Ambiente «pide responsabilidá pa nun difundir datos enquivocaos, que puen xenerar alarma ente la población». Amás, esplica que’l proyectu de presupuestos d’Asturies pal 2012 contempla una partida de 330.000 euros pa modernizar la Rede de Control de la Calidá del Aire.
La reacción del Colectivu Ecoloxista d’Avilés nun tardó en llegar y defendió’l so rigor nos 33 años que tien d’historia. Defenden que lo que faen ye «recoyer unos datos y informar d’ellos porque nin el Principáu nin el Conceyu lo faen cuando nun son bonos». Nel exerciciu 2011 el bencenu aumentó escomanadamente anque les bateríes d’Arcelor –les principales fontes d’esti tipu de contaminación– tuvieren una producción más pequeña qu’otros años. Maticen que l’aumentu foi del 45% (el 50% foi nos primeros diez meses): acordies colos datos de la web del Principáu, la media del 2011 foi de 3,3 microgramos/m3 en contraste colos 2,2 del añu 2010. Polo tanto, diz el Colectivu Ecoloxista que «nun salen les cuentes». Sicasí, un aumentu del 32% tamién lu consideraríen «esmolecedor». El tope establecíu pola llexislación ye de 5 microgramos/m3 de media anual. Nel casu de la estación de Llaranes, los datos dicen que se superaron esos 5 microgramos/m3 en 87 días.
El bencenu (C6H6) ye un hidrocarburu cíclico volátil que presenta reactividá alta con compuestos oxidantes y que ta clasificao como canceríxeno pola Organización Mundial de la Salú, inclusive en dosis mui baxes.
Comentarios fechos (1)
xandru 15/01/2012 a les 15:22:47
Asturies ta emponzoñada por mor d'unes polítiques promocionadores del coche. Gracies a esi paletismu tenemos el centru d'Asturies abrasáu d'autovíes y l'aire fechu una llaceria. Si hubieren gastao la metá nel trasporte públicu otru gallu cantarianos, pero a un pueblu fatu cuerresponde-y unos políticos fatos, eso ye lo que nos diferencia de los suizos, suecos,etc.
04/05/2012 - 2.000 persones piden nes cais d'Uviéu la oficialidá del asturianu
07/05/2012 - Naz el procesu «Compromisu» de la mano de la fusión de Bloque por Asturies y UNA
08/05/2012 - Herbamora presenta'l 9 de mayu n'Uviéu'l so proyectu musical nuevu
20/04/2012 - IX quier que'l PSOE se comprometa a instaurar la circunscripción única
15/05/2012 - Compromisu constitúise nel Nalón
Esta web cuenta con una subvención de la Conseyería de Cultura y Deporte del Principáu d'Asturies
© Diariu LES NOTICIES y PUBLICACIONES ÁMBITU
Cai San Xuan 5, 3u derecha - 33003 - Uviéu
Tel. 985 204 601 - Fax. 985 221 537
Avisu Llegal -
Creitos -
Móvil
