Economía

El Gobiernu asturianu «va poner l'acentu» nel empléu femenín

22/02/2010 a les 14:34:28

La celebración del 8 de marzu, Día Internacional de les Muyeres, va ser un momentu pa intensificar la reivindicación de la igualdá ente les muyeres y los homes, especialmente nun momentu de crisis onde les muyeres avecen a ocupar los peores puestos nos indicadores económicos y d'empléu. Pal Gobiernu asturianu ye una «prioridá» trabayar nesti ámbitu, en palabres de María José Ramos, conseyera de Presidencia, Xusticia y Igualdá: «El Gobiernu asturianu nesti periodu va poner l'acentu nel empléu y, sobre manera, nel empléu femenín. Por eso vamos presentar n'Europa'l proyectu de la Escuela d'Emprendedores y Empresaries cola Asociación Empresa Muyer (ASEM). Queremos collaborar coles muyeres emprendedores pa facilita-yos la entrada nel mundu empresarial y esa va ser una prioridá pal Gobiernu asturianu nesti periodu».

Estes foron delles de les declaraciones que fixo la conseyera de la Presidencia na presentación de les actividaes que se van facer por cuenta de la celebración del 8 de marzu, qu'esti añu van tener a L.luarca como sé central. «Nos últimos años la celebración fíxose na zona central y el 15 d'ochobre, Día Internacional de les Muyeres Rurales, llevóse a Ribadeva, al oriente, polo que pensemos que yera obligao dir nesta ocasión pal occidente, amás de polo que tán trabayando nesta zona pola igualdá y poles muyeres», esplicó Ramos.

Presidencia española de la UE

Otra manera, nesta edición va tenese en cuenta que'l 8 de marzu coincide col semestre de la presidencia española de la Unión Europea, polo que la campaña asturiana básase nel artículu 1 de la Carta Europa pa la Igualdá ente Muyeres y Homes, ellaboráu pol Conseyu de Conceyos y Rexones d'Europa. Esti artículu diz: «…la sociedá democrática nun se pue permitir inorar la capacidá, los conocimientos, la esperiencia y la creatividá de les muyeres…».

La campaña combina esti eslogan cola imaxe del botón d'un Play, que quier ser un convite simbólicu a la sociedá y a les instituciones a actuar pa «impulsar el trabayu de los poderes públicos, pero tamién p'algamar un compromisu ciudadanu mayor na llucha pola igualdá ente homes y muyeres».

Nesti sen, la conseyera de Presidencia remarcó que con esta campaña quier llamase l'atención sobre'l fechu de que «nun podemos inorar la capacidá y el talentu de la metá de la población». Ramos argumentó qu'«amás d'una cuestión de xusticia social y de fortalecimientu de la nuestra democracia, ye una cuestión de rentabilidá económica, de contar con unos activos de los que'l nuestru sistema productivu nun pue permitise'l luxu de prescindir». Otru de los aspectos nos qu'incidió la conseyera de Presidencia foi nel «trabayu en rede» pola igualdá que'l Gobiernu fai col Ministeriu d'Igualdá, colos conceyos y les asociaciones de muyeres.

Actos institucionales

Otra manera, María Campomanes, presidenta del Institutu Asturianu de la Muyer, presentó la programación que se va facer por cuenta del Día Internacional de les Muyeres, qu'arrinca'l 8 de marzu nel auditoriu del Conservatoriu Profesional del Occidente d'Asturies, en L.luarca. Ellí va celebrase l'actu institucional cola intervención del presidente del Gobiernu asturianu, Vicente Álvarez Areces, la conseyera de Presidencia y l'alcalde de Valdés. Amás de les intervenciones institucionales, van participar nel actu María Berdasco Menéndez, investigadora especializada n'Oncoloxía Molecular del Institutu d'Investigación Biomédica de Bellvitge (Barcelona); José Ignacio Nieto García, director del IES Carmen y Severo Ochoa de L.luarca; y Elena Badallo León, coordinadora sociosanitaria del Área Sanitaria I.

Tampoco nun se va escaecer l'aportación a la sociedá de dos valdesanes mui especiales: la poeta Nené Losada, fallecida esti añu pasáu, y la bioquímica Margarita Salas, que va mandar un saluda en videoconferencia dende Madrid. L'actu va clausurase coles actuaciones del alumnáu del Conservatoriu de L.luarca, cola música fusión del grupu Delagua y cola de la intérprete de tonada Mari Luz Cristóbal. P'acabar, la trapecista Laura Bolón va reproducir unes escenes del so espectáculu Inmujerable.

Nos vemos el 8 a las 8. Feminismu, arte y música pa xente mozo ye otra de les propuestes institucionales pal Día Internacional de les Muyeres. Esti alcuentru, que se va celebrar nel Centru d'Arte y Creación Industrial de La Llaboral de Xixón, ta dirixíu a la mocedá y ellí va tar la periodista y creadora del portal Mujeres en Red, Montserrat Boix, que va facer un alcuentru de blogueres. Al empar, va instalase la esposición En barbecho, d'Alicia Jiménez, Premiu Lab-Joven-Experimenta 2009.

En collaboración colos conceyos hai bien d'actividaes previstes en rellación a les tecnoloxíes nueves, la celebración del centenariu del accesu llibre de les muyeres a la universidá y la iniciativa emprendedora de les muyeres.

Otra de les árees d'actividá nes qu'aveza a trabayar l'IAM ye la coeducación: asina, va presentase la unidá didáctica pa Educación Secundaria Abecedario de la sexualidad, una guía de llectura pa les noveles El diario rojo de Carlota y El diario rojo de Flanagan. Igualmente, la revista de lliteratura infantil Platero dedica un monográficu a la igualdá de xéneru.

Otra manera, La igualdá nel deporte. Vamos facer xuntes triatlón ye una propuesta más del IAM en collaboración cola Federación de Triatlón asturiana, que se va desenvolver nos centros d'educación secundaria.

Les actividaes del IAM van llegar tamién a Madrid, concretamente a la Delegación d'Asturies en Madrid: ellí va presentase'l llibru La polémica feminista en la España ilustrada, d'Oliva Blanco Corujo, y nel que participa Amelia Valcárcel. Tamién se va acoyer el ciclu Ellas crean, en collaboración col Ministeriu d'Igualdá, y va esponese la muestra La mujer entre la inspiración y la expiración, fotografíes de l'artista checa Dana Kyndrová. Yá'l 16 de marzu ta previstu'l coloquiu Muyeres enólogues. Les reines de copes, cola periodista, filóloga y escritora Sara Cucala.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam