Cultura

La galería xixonesa Espacio Liquido va participar na feria ARCOmadrid

REDACCIÓN. UVIÉU - 06/02/2012 A LES 13:14:03

La galería Espacio Liquido, asitiada en Xixón, va participar na feria d'arte ARCOmadrid 12, que se va celebrar na capital del Estáu ente los díes 15 y 19 de febreru. Esti añu, la organización de la feria propunxo que cada galería destacara un artista por stand, ensin qu'eso implique'l desarrollu d'un proyectu esclusivu. Esta iniciativa d'ARCOmadrid tien como oxetivu reforciar el papel de fonte de información pa la cantidá de coleccionistes y profesionales que cada añu asisten a la feria. El colectivu artísticu que la galería asturiana va destacar dientro del so espaciu va ser Fernando Gutierrez & Tape, cola obra titulada PHANTASMAGORIA in 3, que va tar acompañada polos trabayos d'Amparo Sard, Rebeca Menéndez, Ellen Kooi, PSJM, Miguel Aguirre, Belen Uriel y Chechu Álava.

Amás de ser los artistes destacaos de la galería Espacio Líquido, Fernando Gutiérrez y Daniel Romero, baxo la marca Fernando Gutiérrez + .tape., foron escoyíos pa facer una intervención artística nel stand del diariu ABC n'ARCO 2012. El proyectu Sala 4, promovíu pol Muséu ABC de Dibuxu y Ilustración, tien como oxetivu apoyar l'arte de los valores más emerxentes de la creación artística española. La obra escoyida, titulada Rapsodia, ye una intervención a costafecha pa esti espaciu de la feria, qu'actúa como una sala más del Muséu, anque tea fuera de la sé de la cai Amaniel de Madrid.

Fernando Gutiérrez y l'artista multimedia .tape. presenten una propuesta envolvente que combina lo sonoro col dibuxu. Rapsodia xenera un mundu hipnóticu onde los sos habitantes pasen la vida baillando una añada. De la que se va texendo la danza, los sos cuerpos choquen; un raspión suave provoca mutaciones y accidentes pequeños tresfiguren los sos organismos. Esti roce incita a la so reproducción y, dacuando, multiplíquense por xeneración espontánea, lo que fai medrar la diversidá xenética. Con cada alcuentru o alteración emítense soníos harmónicos, qu'establecen una composición musical aleatoria de resultaos imprevisibles. Asocede lo mesmo cuando algamen les llendes del so hábitat.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam