Cultura

Galano axunta les sos últimes narraciones en «Faraguyas»

01/09/2010 a les 10:14:37

Manuel García Galano (A Roda, Tapia, 1922), el decanu de les lletres en gallego-asturianu, acaba d'axuntar los sos últimos escritos en Faraguyas, un volume que fai'l númberu 18 de la colección Os Llibros d'Entrambasauguas, qu'edita la Secretaría Llingüística del Navia-Eo, de l'Academia de la Llingua Asturiana.

Faraguyas, con ilustraciones del propiu autor, axunta rellatos curtios, delles veces namás qu'apuntes sobre dalguna anécdota, que l'autor tapiegu foi escribiendo dende la publicación de Vento d'outono (2005), muncho d'ello publicao na web Falaviva.net. Con un dominiu perfectu de la espresión popular, estos retratos costumistes siguen la llinia de les sos esmoliciones –tamién reflexaes nel so teatru–, onde al llau d'un mundu tradicional que muerre tamién hai sitiu pa los problemes y contradicciones de la vida moderna, sobre manera pa la xente más vieyo: la soledá, l'amor, el tratu cola mocedá... Y too col humor que caracteriza a la obra del Galano.

Manuel García Galano, amás de publicar con Jacinto Díaz el Vocabulario da Roda (1994), tien tamién una obra curiosa de creación, tanto na narración –Parzamiques (1992) y el yá mentáu Vento d'outono– como nel teatru –Mareaxes tapiegos (1993) y Erguendo el telón (2002)–. Ye académicu d'honor de l'Academia de la Llingua Asturiana dende l'añu 2005 y recibió nel 2009 el III Premiu Timón, que concede L'Arribada.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam