Cultura

La Fundación Valdés Salas crea un foru sobre Lliteratura y Territoriu

02/09/2010 a les 10:59:19

L’Aula Universitaria Valdés-Salas, al amparu de la Fundación del mesmu nome que tien especial procuru pola estensión universitaria, va impulsar en Tinéu, el 3 y 4 de setiembre, un foru con vocación sobre Lliteratura y Territoriu onde escritores, empresarios y públicu en xeneral van reunise pa intentar responder a trés preguntes que la organización considera esenciales: ¿En qué midida pue contribuír la lliteratura a la construcción d’una imaxe d’Asturies útil pa la so dinamización económica? ¿Pue ayudar la lliteratura a la creación d’una imaxe positiva del territoriu? ¿Qué imaxe del territoriu ta ufriendo la lliteratura asturiana?

El foru, coordináu por Taresa Fernández Lorences, profesora del Departamentu de Filoloxía Española de la Universidá d’Uviéu, y Xuan Bello, escritor, cuenta col amparu de la Universidá d’Uviéu y la Fundación Valdés-Salas. Los actos van celebrase, ente la tarde del 3 de setiembre y la mañana del 4 de setiembre, nel Palaciu de Merás de la villa de Tinéu.

Los organizadores d’esti foru, col que quieren entamar un debate abiertu y permanente sobre la contribución de la lliteratura a la construcción d’una imaxe d’Asturies útil pa la so dinamización económica, son conscientes de qu’una de les claves de los pueblos desarrollaos ye que nellos son mui abondantes los ciudadanos pa los que la imaxe del so territoriu ye un componente esencial del so criteriu d’utilidá personal. Esti componente llévalos a nun descartar fácilmente quedar nél y mesmo asumir mayores costos por consiguilo. Un territoriu con esti prestixu tampoco nun ye indiferente a los habitantes d’otros territorios que, como mínimu, van tratar de disfrutalu consumiendo bienes y servicios producíos nél.

Con estos criterios abiertos al debate, munchos escritores vinculaos al territoriu van sumase a esti foru, que va escomenzar el vienres 3 de setiembre, a les 18 hores, nel Palaciu de Merás. Na presentación del Foru van falar el catedráticu Joaquín Lorences, de la Fundación Valdés-Salas; Isidro Sánchez, del Aula Valdés-Salas; y los coordinadores del foru, Taresa Lorences y Xuan Bello. Depués d’ellos, y presentáu pol economista salense José Feito, va dictar la conferencia Territoriu, cultura y emigración Vicente Riesgo, sociólogu, teólogu, presidente de l’Academia Española de Formación de Bonn y asesor d’Angela Merkel en temes d’emigración.

Tres d’esta conferencia, Kirmen Uribe, premiu nacional de narrativa 2009, va dictar otra conferencia sobre Lliteratura y teritoriu y cómo ve él la so obra dientro de la sociedá vasca.

De parte nueche, tres la cena que se va celebrar ente los asistentes nel Palaciu de Merás, va actuar el Quinteto Cova Villegas.

Yá al otru día, el sábadu 4 de setiembre, a les 12 del meudía, va haber una mesa d’escritores. Moderaos por Leopoldo Sánchez Torre, y col títulu Realidá, ficción lliteraria, perspectives, deformaciones y enfoques, van falar Antón García, Berta Piñán, Xuan Bello, Fulgencio Argüelles y Alfonso López Alfonso.

A les 14 hores va ser la despidida y la clausura del foru.

La Fundación Valdés-Salas ye una entidá privada que tien por oxetivu llevar la Universidá a les zones rurales d’Asturies mediante la organización d’actos académicos y culturales en collaboración con la Universidá d’Uviéu. El conteníu d’estes actividaes selecciónase atendiendo a les necesidaes d’asesoramientu y información de los emprendedores locales en temes de carácter sectorial o intersectorial, intentando satisfacer les demandes de la población en temes d’interés xeneral.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam