Asturies

Francisco Álvarez-Cascos: «N'Asturies hai un tripartitu ente PP, PSOE y "La Nueva España"»

DAMIÁN BARREIRO. UVIÉU - 01/02/2012 A LES 15:49:34

El presidente del Gobiernu y líder de Foru Asturies concede la primer entrevista a un mediu de comunicación asturianu depués d'anunciar la convocatoria d'elecciones autonómiques pal 25 de marzu. Nos próximes díes, LES NOTICIES.COM va dir ofreciendo'l conteníu completu de la conversación mantenida col xefe del Executivu, onde Álvarez-Cascos fala con dureza de la oposición y de la situación política d'Asturies.

¿Va ser usté'l candidatu de Foru Asturies pa les elecciones del 25 de marzu?
Esa pregunta va tener que contestala la Comisión Directiva de Foru. Soi una persona que considera que la normalidá básase na norma y yo soi'l primeru en someteme a les normes pa dar exemplu y pa que'l funcionamientu de Foru se caracterice pola normalidá. Toi a disposición de la Comisión Directiva.

Na comparecencia onde anunció la convocatoria de les elecciones, dixo que se sentía más apasionáu que nunca na llucha por Asturies. ¿Pue entendese neses palabres la so intención de ser candidatu?
Parezme que si yo quixera tirar la toalla, si me diera, lo único que tenía que facer yera dexame llevar pola corriente, dexame arrastrar polos que consideren que ye posible gobernar nun escenariu de prórroga presupuestaria porque dicen que yá hubo antecedentes n'Asturies. Compárese, entós, la situación actual colos que taben dispuestos a sacrificar l'interés d'Asturies pa poder siguir, anque fora conviviendo cola prórroga presupuestaria. Si creyemos nel sistema parllamentariu, creyemos nes sos regles y principios, y nun sistema parllamentariu hai un principiu éticu, que nun ta escritu pero que se supón que ta asumíu polos que formamos parte d'él, y ye que la esencia de l'acción d'un Gobiernu ye'l so programa: el qu'ún presentó a los ciudadanos y qu'éstos votaron, lo que fai d'él un contratu. Esi programa en cifres ye'l presupuestu, por eso yo lu definí como'l llibru de cabecera del Gobiernu. Resulta que, cuando presentamos el presupuestu, cumpliendo les normes y cumpliendo'l programa, la oposición refúgalu por mayoría absoluta, colo que quedamos ensin llibru de cabecera. Amás, si una parte de los que lu refuguen ye'l Partíu Popular, qu'hai un añu votó en contra del presupuestu prorrogáu del Gobiernu anterior –y qu'agora nos obliguen a xestionar–, abúltame que ye la confirmación de que'l sistema parllamentariu nun pue convivir con una situación tan anómala, onde los qu'imponen un programa de Gobiernu piensen qu'esi programa ye negativu. Polo tanto, parezme que los asturianos tienen el derechu llexítimu a ser ellos los que tomen el determín; non nengún grupu de presión por intereses inconfesables, o los chiringuitos o los medios de comunicación, sinón los asturianos, llibremente y col so votu secretu.

Fala de grupos de presión y medios de comunicación. Amás del PP y el PSOE, ¿qué otros poderes fácticos o medios de comunicación taben interesaos nesa situación?
Equí n'Asturies hai un tripartitu políticu, que ye'l tripartitu de La Nueva España, el Partíu Popular y el Partíu Socialista, de los que los líderes son el señor Vaquero, la señora Espinosa y el señor Fernández. Espero que se presenten a les elecciones los tres, nun siendo que, si dalgún se retira na campaña electoral, yá sía'l reconocimientu del so propiu fracasu. Parez que yá hai dalgún niciu de qu'hai rectificación –y, polo tanto, reconocimientu del fracasu– por dalgún de los líderes d'esti tripartitu.

Aparte de La Nueva España y los partíos políticos, ¿hai dalgún poder económicu que nun quiera qu'haya cambiu n'Asturies?
Llamen l'atención declaraciones en feches recientes de la cúpula de FADE, que son siempre anónimes porque los que dan eses opiniones que depués recueye La Nueva España son fontes anónimes, anque tengan cara y güeyos y sían conocíos. Sicasí, los portavoces de FADE nun les desmienten, colo qu'hai un xuegu doble claru nestes persones que se valen del anonimatu pero depués nun usen el so protagonismu pa esclariar los mensaxes confusos. Quier dicise, parezme que, nesti casu, les opiniones válides de los empresarios asturianos son les qu'espresen personalmente con nome y apellíos, non les que, anónimamente y baxo'l paragües de FADE, aparecen periódicamente en La Nueva España, como les que se publicaron el vienres 27 de xineru.

Volviendo al tema de les elecciones, vamos poner que'l 25 de marzu Foru Asturies vuelva a ganales: ¿caltendría la estructura actual del Gobierrnu? ¿Enfotaríase nel mesmu equipu?
Parezme que, nesti momentu, pa siguir l'orde razonable de les coses, lo primero que tenemos que facer ye tomar les decisiones de presentación de candidatures, facer la campaña, participar activamente nel debate y atender pa la voz de los asturianos al traviés de los votos. Yo nun voi perder tiempu en facer pronósticos. Los pronósticos son pa los quinielistes, y yo, como quinielista modestu, cuando xugaba más asiduamente ponía siempre que ganaba'l Sporting, pero nun inflúia con eso nel resultáu del partíu. Polo tanto, los aficionaos a les quinieles nun inflúin nos partíos y a mi lo que m'interesa ye influír nesti partíu: participar naquello que pueda ayudar a que Foru revalide la so victoria nestes elecciones y lo faiga con una mayoría lo más amplia posible, anque la reválida del resultáu de mayu yá supón un golpe seriu pa los qu'estrapolaron los resultaos de les elecciones xenerales.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam