Cultura

Felpeyu, Tierra Discos y el Conceyu d'Uviéu dan un reblagu na dinamización de la escena folk na ciudá

11/03/2010 a les 13:27:30

Va venti años que la capital d'Asturies yera un referente na escena folk a traviés del ciclu Uviéu Folk, nel que s'acoyía a los grupos más representativos d'esti xéneru. Agora, l'asociación cultural Felpeyu y la discográfica Tierra, en collaboración cola Conceyalía de Cultura, la Sociedá Ovetense de Festejos (SOF) y el periódicu LES NOTICIES, entamen el primer ciclu Uviéu Tierra Folk, onde delles de les bandes más señalaes del folk van enseñar les sos novedaes musicales y espectáculos nel Teatru Filarmónica.

Asina se punxo de manifiestu na presentación del ciclu: «La intención ye recuperar el ciclu de folk tradicional qu'había n'Uviéu, dalgo qu'hai qu'agradecer a los cuatro grupos participantes y particularmente a Felpeyu y Tierra Discos, que son los promotores de la iniciativa», remarcó José Arias Cachero Felechosa, conceyal de Cultura d'Uviéu. Otru de los aspectos nos qu'incidió l'edil foi en que «n'época de crisis y d'austeridá, el ciclu nun va costar un duru a los uviedinos, sinón qu'estos cuatro grupos, mui potentes toos ellos, asumen el riesgu d'esponese énte'l públicu y el costu va cubrise a traviés de les entraes de los conciertos, a unos precios mui económicos».

Xuan Nel Espósitu, miembru de Felpeyu, quixo agradecer a les bandes la so participación nel ciclu y comentó qu'efectivamente, el so oxetivu yera «dinamizar la escena folk n'Uviéu y recuperar el pulsu qu'ésta tenía va tiempu». Al empar, Lisardo Prieto, responsable de Tierra Discos, recordó que'l proyectu arrinca yá nel 2008, añu nel que Felpeyu y Tuenda presentaben los sos últimos trabayos nel Teatru Filarmónica d'Uviéu: «Daquella foi un gran éxitu y tamién se fixo en collaboración col Conceyu d'Uviéu, polo que vamos repetir la esperiencia, qu'esperamos que sía'l pistoletazu de salida pa la temporada musical d'esti añu», declaró.

El ciclu principia'l 20 de marzu cola actuación del grupu Verdasca, que va presentar el so primer trabayu discográficu D'abéu. El 3 d'abril ye'l turnu pa la formación vallisoleta Vallarna, que trai al públicu asturianu Km90, mentes que'l 10 d'abril Los Ciquitrinos presenten l'espectáculu del discu Faciendo l'indio. El ciclu ciárralu Corquiéu'l 24 d'abril cola presentación del so tercer trabayu Suaña.

Les entraes van ponese a la venta anticipada na taquilla del Teatru Campoamor, nos caxeros de Cajastur, na web d'esta entidá bancaria y nel teléfonu 902 106 601. P'asistir a tol ciclu hai un abonu de venti euros que se pue comprar hasta'l 18 de marzu, mentes que les entraes pa cada conciertu van poder mercase a siete euros na taquilla del Teatru Filarmónica'l mesmu día de cada conciertu.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam