Asturies

Fai! ridiculiza una concentración antialbortista

09/03/2010 a les 16:15:38

Foi Horacio’l que dixo que nada impidía dicir la verdá riendo. El colectivu d’esquierda soberanista Fai! asistió a una concentración antialbortista, que convocaren delles asociaciones pro-vida, con ánimu de rise y facer que rescamplaren les contradicciones de los manifestantes. Según informen al través d’una nota prensa, el 7 de marzu convocárase na plaza la Escandalera d’Uviéu «una concentración de la ultraderecha católica pa posicionase nuna actitú moralista y machista a la escontra del albuertu». Un piñu de militantes de Fai! acudió con una pancarta onde se lleía «Los rrojos se comen a sus hijos. Yo lo bi», al tiempu qu’espardieron un panfletu «con una introducción reaccionaria que foi mui bien acoyida polos presentes». Esti acababa con un llamáu a considerar enfermes a les persones que pudieren tar d’alcuerdu coles afirmaciones que previamente s’espunxeren contra’l divorciu, el trabayu de la muyer, los biquinis o los preservativos.

Según Fai! nin la pancarta nin los militantes de Fai! llevantaron les sospeches de los manifestantes pro-vida, hasta «qu’una docena de persones abordó a les/os militantes de Fai! a emburriones, rompiendo la pancarta pela metá y entamando a pataes y puñetazos que torgaron la llibertá d'espresión que los presentes calteníen en silenciu. Los/es militantes de Fai! nun entraron en provocaciones y, tres de cumplir l'oxetivu de visibilizar énte la prensa la indignidá de los convocantes, abandonaron la plaza». Depués, dellos militantes de Fai! repartieron un planfetu inxeniosu y irónicu.

Fai! quixo con esti actu, según aclaria na nota prensa, ridiculizar al movimientu antialbortista, un colectivu que consideren «minoritariu, sectariu nel sen más esplícitu del términu, al que la mayoria de la población tien por "aventaos" y qu'anecia na doble vara de midir no qu'a la defensa de "la vida" se refier, pero qu'inda tien munchu pesu na sociedá».

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam