Actualidá

ETA pon como oxetivos la entrega de les armes y la vuelta de los presos

IVÁN G. FERNÁNDEZ. UVIÉU - 11/11/2011 A LES 10:47:29

Trés selmanes depués de qu'ETA fixera públicu'l so determín de dexar l'actividá armada de manera definitiva, la banda terrorista vuelve a ser protagonista en mediu de la campaña electoral pal 20 de payares. Nuna entrevista que publica’l 11 de payares el diariu vascu Gara, ETA asegura que na so axenda inclúise «el desarme» y la «vuelta a casa de los presos», y como oxetivu afita'l derechu a decidir del pueblu vascu.

Nesta entrevista de quince páxines que publica'l diariu vascu –concedida por dos representantes de la banda–, ETA sofita'l procesu políticu qu'acaba d'entamar la esquierda abertzale, pero descártase como interlocutor nun posible procesu de negociación.

N'otru momentu de la entrevista, los interlocutores apunten que «lo que toca agora ye entamar conversaciones directes ente ETA y los Estaos español y francés, nes que tienen que participar observadores internacionales que garanticen el cumplimientu de los alcuerdos». Amás, señalen como temes fundamentales la vuelta a casa de tolos presos y exiliaos políticos vascos, la inutilización de les armes d'ETA y la «desmilitarización d'Euskal Herria». Nesi sentíu, destaquen que «la cuestión de les armes ta incluída na axenda de la negociación ente ETA y l’Estáu» y que tán «dispuestos a falar d'ello y tamién a adoptar compromisos, na lóxica de la solución de toles consecuencies del conflictu». En cuantes al tema de la vuelta de los presos vascos, ETA considera que «cualquier otra opción namás se pue proponer dende propósitos de venganza o por intereses políticos particulares, pero nun se pue imaxinar la paz coles cárceles enllenes de presos políticos vascos».

Per otra parte, na entrevista, los representantes d'ETA aseguren que son conscientes de que los sos actos «causaron munchu sufrimientu y nun somos insensibles». Y maticen que «la víctima principal del conflictu ye Euskal Herria, un pueblu que quixeron facer desaparecer y que foi agredíu de contino».

A lo llargo de la entrevista tamién se fala de les próximes elecciones del 20-P. ETA manifiesta que nun-y da más el partíu que vaiga gobernar l'Estáu español los próximos cuatro años porque eso «nun ser una variable decisible» y el que gobierne «va tener enriba la mesa'l conflictu que mantién Euskal Herria y el llamamientu concretu fechu pola Conferencia Internacional y pola propia ETA». Nesa mesma llinia, los representantes de la banda terrorista destaquen «la ruptura col discursu negativu, agresivu y ensin sentíu d'hasta agora» del presidente del PP y candidatu a les elecciones xenerales Mariano Rajoy.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam