Actualidá

ETA anuncia un altu'l fueu

05/09/2010 a les 23:26:35

ETA anunció'l domingu 5 de setiembre un altu'l fueu a traviés d'un videu unviáu al periódicu vascu Gara y a la emisora británica BBC. Nel videu aparecen tres persones cola cara tapada y una d'elles, una muyer, llee un comunicáu n'eusquera onde anuncia que la banda decidió hai unos meses «nun llevar alantre acciones armaes ofensives». Sicasí, nel comunicáu nun s'aclaria si la renuncia d'ETA a cometer atentaos ye temporal o definitiva.

«ETA confirma'l so compromisu d'atopar una solución democrática al conflictu», diz la declaración, qu'añade: «Nel so compromisu con un procesu democráticu a decidir llibre y democráticamente'l nuestru futuru a traviés del diálogu y la negociación, ETA prepárase güei como ayeri pa un alcuerdu nes condiciones democrátiques mínimes necesaries para echar a andar un procesu democráticu, si'l Gobiernu español ta dispuestu». La portavoz conclúi diciendo: «Pidimos a tolos ciudadanos y ciudadanes vasques que sigan na llucha, caún nel so campu propiu, col grau de compromisu que tengan, de tal manera que toos podamos echar abaxo la muria de la negación y deamos pasos alantre irreversibles nel camín hacia la llibertá».

L'anunciu produzse dos díes depués de que la esquierda abertzale y Eusko Alkartasuna (EA) publicaren un documentu onde pidíen a ETA que declarara un «altu'l fueu permanente y con verificación internacional», dos condiciones que nun s'atopen esplícitamente nel comunicáu de la banda. Los representantes de la esquierda abertzale foron los primeros en valorar la decisión d'ETA, a la que califiquen d'«unilateral, indefinida y non condicionada» y que supón, a xuiciu de los independentistes vascos, «una aportación d'un valor incuestionable pa la instauración de la paz y la consolidación d'un procesu democráticu».

Les reacciones
El Gobiernu español nun quixo facer declaración nenguna, anquel ministru del Interior, Alfredo Pérez Rubalcaba, aconceyó cola cúpula directiva del Ministeriu p'analizar el testu d'ETA y púnxose en contactu col Gobiernu d'Euskadi y los portavoces parllamentarios. Quien sí fixo declaraciones foi l'Executivu vascu pente medies del conseyeru d'Interior, Rodolfo Ares, que, depués de señalar que «cualquier declaración que fale de la suspensión d'atentaos terroristes –anque sía namás temporal– tien que considerase una bona noticia–, tachó l'anunciu d'«insuficiente, ambiguu y fraudulentu». Amás, Ares alvirtió de que les fuerces y cuerpos de seguridá del Estáu «nun tán en tregua».

Los partíos políticos coinciden na so desconfianza n'esti altu'l fueu y en calificar d'«insuficiente» l'anunciu de la banda, amás de señalar qu'ETA tien que llegar hasta acabar definitivamente cola violencia y disolvese. Nesti sentíu, el PNV, que va esperar hasta'l llunes pa facer un análisis más detalláu, señaló que'l comunicáu «nun ye'l qu'ETA debe a la sociedá vasca nin el qu'ésta esperaba».

Pela contra, Iñaki Soto, l'editor axuntu del periódicu Gara, ún de los receptores del comunicáu d'ETA, dixo en declaraciones a la BBC que'l pueblu vascu tuviera esperando esti comunicáu. «Creo que ye un pasu grande y positivu. Creo qu'esto ye dalgo que la mayoría de la sociedá vasca taba esperando y, nesti sentíu, parezme que ye dalgo que naide pue dicir que ye negativo», dixo Soto, que se mostró convencíu de que «va ser un camín llargu pero ye dalgo que pue traer la paz y la xusticia pal País Vascu».

Barbara Dührkop, viuda del senador Enrique Casas, asesináu por ETA en 1984, dixo que la declaración ye un pasu positivu, pero que nun va tolo lloñe que se necesita. «Sigue siendo insuficiente, porque fálase d'altu'l fueu, del procesu democráticu, pero nun hai nada sobre dexar les armes y la permanencia del altu'l fueu. Por too ello, hai que ser mui cuidadosos a la hora de cuantificar el valor real d'esti anunciu», dixo.

Fundada en 1959, ETA desendolcó dende entós una campaña de muertes pola independencia de les siete rexones vasques (cuatro nel Estáu español y tres na República Francesa), que los separatistes vascos reclamen como propies.

Les últimes conversaciones de paz rompiéronse nel 2006 depués d'una bomba d'ETA nel aparcamientu de la Terminal 4 del aeropuertu de Madrid-Barajas, que mató a dos ciudadanos ecuatorianos.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam