Cultura

Espectáculu y bona música na gala del Meyor Cantar

21/02/2010 a les 11:46:10

Los cinco finalistes del Premiu al Meyor Cantar dieron unes interpretaciones mui bones nel Auditoriu de la Casa Cultura de Mieres. Estilos musicales mui distintos, gran calidá de voces y instrumentistes y, en resumíes cuentes, un espectáculu dinámicu, variau y intensu que nun ye vezu ver n’Asturies. La Gala del Premiu al Meyor Cantar ye un acontecimientu únicu pa comprobar la fuerza que ta garrando la creación de cantares orixinales en llingua asturiana. O, lo que ye lo mesmo, tan consiguiéndose los fines pa los que se creó esta competición: animar a la creación de música contemporánea n’asturianu y difundir los cantares y intérpretes protagonistes d’esti procesu. Y too nun espectáculu áxil y emocionante onde los músicos y voces participantes diéronlo too y más pa con ello.

Xera abrió la Gala con una puesta n’escena intensa y dinámica cola interpretación del so cantar «Tierra». La electrónica y la música tradicional llenaron y fixeron vibrar tol Auditoriu y dexaron claro que na Gala diba haber nivel. Y el públicu respondió-yos con una ovación mui zarrada. Depués salieron al escenariu Misiva. El cuartetu de Grau nun quedó atrás. Con un estilu punk-rock, el so apueste nel concursu yera «La casa'l mieu». Un cantar sobre la emigración onde la fuerza del estribillu y la entrega del cantante y del restu la banda metieron el ritmu nel patiu de butaques. Ehí llegó la segunda gran ovación de la nueche.

Cola actuación de Lafu y Rebeca llegóse al ecuador del concursu. El dúu nesti casu yeren cinco, porque contaben con un clarinete y con un coru de dos voces más. Col cantar «El mio sitiu», la voz de Rebeca Velasco fíxose dueña y señora del Auditoriu de Mieres. El cantar, frescu y pegadizu, coreáronlu nel patiu de butaques con palmes. La intensidá diba medrando na gala y la reacción del públicu tamién. Pero tovía había muncho y bono por venir. Los siguientes en pisar l’escenariu yeren Brandal. La suavidá de la flauta dio arranque al tema «Chueve», un cantar nel que la inmensidá de la voz de Tania Pereira llega al so esplendor. Brandal brindó al públicu un momentu íntimu y emocionante. Al final los aplausos foron rotundos.

Y pa rematar el concursu, los veteranos Dixebra, que con el so cantar «El dinamiteru» dieron un cambiu de ritmu hasta les antípodes. Pa esta ocasión los habituales nueve componentes de Dixebra contaben cola presencia d’una segunda voz y de teclaos. Once componentes y una interpretación que dexaron pequeñu l’escenariu de la gala. Una ovación pa Dixebra daba por finalizada la fase a concursu.

Yera’l momentu de que’l xuráu se retirara a tomar una decisión que, polo visto nel escenariu y poles reacciones del públicu, nun diba ser fácil de tomar. Cola Directora Xeneral de Política Llingüística, Consuelo Vega, como presidenta, y compuestu pola escritora Sofía Castañón, la cantante y profesora de tonada Anabel Santiago, el coordinador del Festival Liet Internacional, Onno Falkena, y los críticos Aurelio Argel y David Serna, el xuráu tenía 15 minutos pa escoyer un ganador. Nesi tiempu, nel escenariu de Mieres daba un miniconciertu Alfredo González, ganador del Premiu al Meyor Cantar na edición anterior. Alfredo interpretó cantares del so últimu discu n’asturianu, cuando acompañáu del restu de la banda, cuando en solitario acompañándose del pianu. El de Turón dio un conciertu elegante que supo a poco, pero había que dar pasu al fallu del Premiu.

Una intervención curtia del Alcalde de Mieres, Luis María García, dio pasu a unes palabres de Consuelo Vega, Directora Xeneral de Política Llingüística del Gobiernu d’Asturies, onde fixo balance del apoyu de la Conseyería de Cultura a la creación en llingua asturiana. Consuelo Vega foi tamién breve porque había tensión nos camerinos y emoción contenida nel patiu de butaques. Abrió’l sobre que contenía el fallu del xuráu y comunicó a los presentes que’l ganador de la cuarta edición del Premiu al Meyor Cantar yera Xera y el so tema «Tierra». Los componentes del grupu ganador recibieron la escultura La Payarina, obra de l’artista María Xesús Rodríguez, y mui emocionaos agradecieron el premiu. Yá namás faltaba la despidida. Ciarrar una nueche de bona música y espectáculu col cantar ganador. Los de Xera volvieron a llenar el escenariu y esta vez, con una entrega yá absoluta, demostraron que la so propuesta tien fuerza, mensaxe y orixinalidá.

Amás de la escultura La Payarina, valorada nel circuitu artísticu en más de dos mil euros, Xera, como ganadores, van contar col apoyu del Gobiernu na difusión del so últimu discu, van tocar pal Día d’Asturies y van representar a Asturies nel Festival Liet Internacional de les llingües minoritaries europees que se va celebrar el venti de payares n’Escocia. Asturies ye’l primer país, de los participantes, qu’escueye cantar pa esi concursu que ye un equivalente a Eurovisión pero en llingües minoritaries. Los demás países van dir escoyéndolos de la que vaiga andando l’añu. El coordinador del Festival Liet, Onno Falkena, destacó la gran calidá musical de la final y emponderó a la organización pola axilidá de la Gala teniendo en cuenta la dificultá técnica que supón un eventu en directo d’estes característiques. La Gala, que foi conducida polos escritores y periodistes Vanessa Gutiérrez y Naciu Varillas, emítise en TPA'l domingu 21 de febreru a les 21.30 hores. Enllaz: Premiu al meyor cantar 2010

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam