Sociedá

Ésitu de públicu nes xornaes de puertes abiertes del Centru Niemeyer d'Avilés

23/08/2010 a les 15:43:40

Más de 10.000 persones visitaron esta fin de selmana les obres del Centru Oscar Niemeyer d'Avilés, según informó la organización. Provistos de xalecos reflectantes que s'entregaben a la entrada, el públicu pudo ver, n'obres, l'edificiu del auditoriu (estragal d'accesu y sala de cociertos dende lo que va a ser l'escenariu), edificiu d'usos alministrativos y de tienda de souvenirs, y l'edificiu semiésféricu del muséu. Esti últimu ye'l que ta más avanzáu pol interior y cuenta, amás, con una lámpara de techu circular de dimensiones grandísimes diseñada pol propiu arquitectu brasileñu. Nesti edificiu, que tien planta y pisu primeru (nun terciu aprosimao del área total) los visitantes pudieron ver un videu promocional del edificiu y de les actividaes que va promover o que yá ta entamando'l Centru Niemeyer, y que quieren ser un revulsivu de l'actividá económica de la comarca avilesina pentemedies de la industria cultural. La torre, con vistes panorámiques y que va a tener un usu hosteleru, nun podía visitase y namás se contemplaba dende la esplanada esterior.

Dientro de les actividaes entamaes pol Centru Oscar Niemeyer en collaboración col Teatru Palacio Valdés destaquen el montaxe de la obra teatral The Tempest, de William Shakespeare, del 26 al 28 d'agostu, pal que tovía queden dalgunes entraes a la venta, y un conciertu que va dar el violonchelista d'Estaos Uníos, Yo-Yo Ma nel mes de setiembre. El Centru Niemeyer, dirixíu por Natalio Grueso, cuenta col apoyu económicu del Gobiernu d'Asturies y del Gobiernu d'España y ye la materialización del proyectu qu'Oscar Niemeyer regaló a la Fundación Príncipe d'Asturies pa celebrar el venticinco cumpleaños de la institución. El Centru Niemeyer d'Avilés supón la única obra diseñada pol centenariu arquitectu edificada na Península Ibérica y de les poques qu'hai n'Europa.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam