Editorial

Enseñanza y tresversalidá

LES NOTICIES. UVIÉU - 28/07/2011 A LES 09:45:41

Teniendo en cuenta la situación tan delicada que vive la llingua asturiana, la recuperación del nuestru idioma, l’avance na normalización social y la pervivencia mesma del asturianu son oxetivos irrenunciables de la política llingüística qu’ha desenvolver el Gobiernu d’Asturies. Como ferramienta de comunicación oral, l’asturianu pervive más n’ámbitos de confianza y coloquiales que nos llaborales, l’Alministración pública o la mayoría de los medios de comunicación. Amás, el conocimientu que tien la ciudadanía del asturianu escrito ye xeneral: nun se conoz la gramática nin la ortografía con soltura. Por eso hai que felicitase por que’l Gobiernu quiera fomentar una cosa tan evidente como necesaria: el conocimientu rigorosu del asturianu. Y el significáu de la palabra rigorosu ye mui importante. Anque llevamos años d’enseñanza del asturianu y del gallego-asturianu nes escueles públiques, los resultaos pueden calificase de probes. Esa enseñanza siempre tuvo qu’arrecostinar cola falta d’inversión y de llibros de testu, la precariedá y interinidá del profesoráu, la falta d’ufierta de l’asignatura nos centros..., lo que llevó a que les hores d’asturianu foren poques y los conocimientos adquiríos, mui desapariaos. Pa nun siguir calteniendo una situación de fracasu na enseñanza del asturianu ye imprescindible facer los cambios pertinentes pa que la ciudadanía acceda a un conocimientu rigorosu del nuestru idioma, y qu’ésti tenga una utilidá oficial, un reconocimientu, una valía a efectos alministrativos na valoración de les oposiciones y n’otres estayes, como faculta la Llei d’Usu. Mentes nun haya esi reconocimientu –que dea utilidá y valor al estudiu del asturianu falao y escrito, validao too ello poles pruebes y exámenes oficiales pertinentes–, nun se va consiguir qu’haya profesionales conocedores del idioma en toles estayes qu’una normalización de­manda. ¿Pa qué se va estudiar rigorosamente un idoma si nun val el so conocimientu oficialmente? Namás que por pura vocación. Cola entrada en vigor d’esa valoración alministrativa, veránse llogros nel sistema educativu en tolos niveles, incluíu –por ser vital– l’universitariu. El pueblu, formáu, va poder acceder a la creación cultural na llingua propia, a les investigaciones, a los medios de comunicación, etc. Namás cola xeneración d’una dinámica nueva va poder salvase l’asturianu. Por eso ye tan importante que la política llingüística –como parez polo sentío hasta agora– sía una prioridá pal presidente y pal conseyeru de Cultura, amás d’una política tresversal de tol Gobiernu porque, si se quier tener éxitu d’una vez, tien qu’alcanzar a árees de trabayu vitales, como son les conseyeríes d’Educación y Universidaes, Presidencia o Facienda y Sector Públicu.

LES NOTICIES