Llingua

Doi la Cara pola Oficialidá festexa les 10.000 semeyes con una xornada enllena d'actividaes en La Pola Siero

18/11/2009 a les 16:18:00

La campaña Doi la Cara pola Oficialidá, iniciativa que lleva alantre dende hai más d’un añu'l Conceyu Abiertu pola Oficialidá (CAO), algamó la cifra de les 10.000 semeyes de persones retrataes col lema que da títulu a la campaña, según informaron Carlos Pulgar, portavoz del CAO, y Poli Mencía, coordinador de la campaña.

Nuna rueda de prensa, anunciáronse los actos que se van facer el 28 de payares en La Pola Siero pa celebrar esta cifra tan significativa. La Pola Siero va convertise nel escenariu escoyíu pol CAO pa celebrar la cifra de les 10.000 semeyes de la campaña. Según el coordinador, Poli G. Mencía, les 10.000 semeyes «suponen una etapa más, un principiu y non un final». Mencía esplicó na rueda de prensa ofrecida na sé del CAO que’l motivu d’escoyer la capital de conceyu de Siero p’acoyer estos actos festivos «ye porque bona parte de la xente que participó na campaña son d’esti conceyu y, amás, ye un sitiu céntricu n’Asturies».

El sábadu 28 de payares les actividaes van empezar a les 12 del mediudía con una partida de bolos nel Parque Alfonso X, na que van participar la Federación Asturiana de Bolos, l’ex-xugador del Sporting de Xixón Cundi y el ciclista, hasta esta temporada del Astana, Chechu Rubiera. A partir de les 16.30 los más pequeños van poder participar nos xuegos tradicionales que se van facer na recién remocicada Plaza d’Abastos. Tiru cuerda, carreres de panoyes, correr l’aru y «munchos xuegos más de los que presten». Al mesmu tiempu y nel mesmu sitiu, Milio’l del Nido va ofrecer una esbilla de cuentos.

Nesta xornada festiva tamién va haber sitiu pa les tecnoloxíes nueves. Asina, dende les 17 y hasta les 19 hores, na Plaza d’Abastos, va ofrecese una muestra de software llibre n’asturianu a cargu de l’asociación Softastur. Les persones interesaes van poder probar el sistema operativu Ubuntu y toes aquelles que lleven l'ordenador van poder instalar esti sistema de software llibre. Nel mesmu escenariu, dende les 19 hores va empezar un alcuentru de pandereteres. Nesi actu van tar presentes los grupos Herbamora, Nerbia, Pandereteres de Fitoria, Melarde y el grupu de pandereteros Cantaruxare. Tolos grupos van facer un pasucáis y un ramu nel que van tar acompañaos por Los Sidros de Valdesoto.

P'acabar esta xornada festiva y reivindicativa, a partir de les 21 hores, va facese un amagüestu na sé del antiguu Bancu Central de La Pola Siero. Castañes y sidra, amás de música y baille van poner el ramu a los actos. Les actuaciones musicales van tar protagonizaes por Toli Morilla, Anabel Santiago, La Curuxa, Duerna y les Pandereteres de Fitoria. Nesi sentíu, Mencia quixo destacar «la collaboración de los llagareros de la zona», que donaron de manera desinteresada la sidra que se va consumir nel amagüestu.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam