Cultura

Dixebra gana l'AMAS al Meyor Discu de Rock

06/03/2010 a les 10:02:27

Dixebra ganó'l Premiu Amas al Meyor Discu de Rock por Amor incendiariu (L'Aguañaz), l'álbum que punxeron na cai a últimos del añu pasáu, na gala d'entrega d'esos gallardones que se celebró n'Uviéu'l vienres 5 de marzu. El grupu que lidera Xune Elipe tamién trunfó na categoría dedicada a la Meyor Portada y Diseñu gracies al trabayu de LeZink.

Los grandes trunfadores de la nueche foron los componentes de Muñeco Vudú, que ganaron los premios de Grupu Revelación, Meyor Canción de Rock y Otros Instrumentos, que recayó nel saxofonista de la banda. Amás, Alfredo González ganó los premios al Meyor Teclista y Meyor Canción Otres Escenes por La nada y tu, mentes que The Electric Buffalo llevaron los gallardones de Meyor Baxista y Meyor Batería. Los AMAS honoríficos foron pa Jorge Martínez, líder d'Ilegales, y el productor Pedro Bastarrica, a manera d'homenaxe póstumu.

El premiu a Amor incendiariu refrenda'l bon recibimientu del últimu trabayu de Dixebra, que'l xueves 4 de marzu recibía en Madrid el Premiu de la Música a la Meyor Canción n'Asturianu y qu'hai unos díes yera finalista, con otra canción d'esi mesmu discu, nel Premiu al Meyor Cantar en Llingua Asturiana, un gallardón que ganara l'añu anterior Alfredo González pola canción qu'agora acaben de premia-y nos AMAS.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam