Sociedá

Diana Navarro pide disculpes personalmente a Dixebra

10/03/2010 a les 14:00:00

La cantante malagueña Diana Navarro volvió a pidir disculpes a Dixebra depués de la polémica xenerada nos Premios de la Música que s'entregaron en Madrid el 4 de marzu pasáu.

Navarro espresó les sos disculpes nun corréu electrónicu unviáu al grupu asturianu onde-yos diz que «si vos sentistis ofendíos colos mios comentarios nos Premios de la Música, pídovos perdón». Amás, asegura, «en nengún momentu quixi ofender a naide y menos rime o ridiculizar la llingua asturiana». La cantante esplica que tien familia asturiana y que nel so próximu discu, el cuartu, «vamos meter una praviana».

En rellación col comentariu que fixo depués d'entrega-y a Dixebra'l Premiu a la Meyor Canción en Llingua Asturiana, comentó que «sentí que l'ambiente mostrábase tensu y ocurrióseme qu'esa broma podía facer que toos nos riéremos». «Nun foi nada personal, en serio. Yo nun vía que fora'l foru afayadizu pa reivindicar y ocurrióseme esa salida», sigue la cantante malagueña. Otra manera, en cuantes a la reivindicación tamién entiende que «nun hai muchos sitios onde se pueda facer».

P'acabar, Diana Navarro espera que'l grupu nun tomara a mal los sos comentarios «porque daríame muncha tristura. Espero de corazón qu'entendáis que nun hubo mala intención y norabona pol premiu».

Pela so parte, Dixebra agradeció-y a Diana Navarro les disculpes y valoró'l xestu de la cantante malagueña, amás de dici-y qu'esperen oyer llueu'l tema asturianu que va sacar.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam