Votos: 3

• 1
• 2
• 3
• 4
• 5

Diana Navarro: «Comparto con Dixebra la reivindicación que fixeron pol asturianu»

La cantante Diana Navarro presentó esti añu na gala de los Premios de la Música la parte dedicada a les canciones n'otres llingües peninsulares. La so intervención depués de que Xune Elipe, cantante de Dixebra, dirixera unes palabres n'asturianu al públicu al recoyer el gallardón foi mui comentada en dellos foros porque hubo quien la interpretó como un despreciu hacia la llingua asturiana. Nesta entrevista fala d'aquel momentu y da la so opinión sobre l'asturianu.

IVÁN G. FERNÁNDEZ
Premios de la Música. ¿Tierra, trágame?
[Rise] Non, non, pero si tenemos en cuenta les molesties, por llamalo de dalguna manera, que se causaron pola mio broma... La verdá ye que nun quería ofender a naide. Parezme que quedó too aclariao. Falé personalmente con Dixebra y ellos entendiéronlo perfectamente. Yo almiro y respeto muncho la cultura asturiana, lo mesmo que la catalana o la gallega... Amás, ¿cómo nun les voi respetar si a los andaluces siempre nos ridiculicen por falar como falamos?

Teniendo en cuenta tol espolín que se montó, ¿volveríes a facer eses declaraciones depués d’entregar el premiu a Dixebra?
¿Sabes qué pasa? Que, como yo entiendo la broma, diríate que sí y como tampoco nun entiendo que fora nenguna ofiensa pa naide... Foi más una cuestión de nun entender lo que se dicía. Y, en tou casu, taría riéndome de la mio manera de falar. Otra manera, yá sé que l’andaluz nun ye un idioma y yo en nengún momentu lo comparé col asturianu, que sí lo ye. Depués yo pidi disculpes y insisto en que nun quería ofender a naide.

Hubo xente que te defendió diciendo que’l discursu de Dixebra taba fuera de sitiu. ¿Tas d’alcuerdu?
Yo entiendo que si ellos lo lleguen a dicir nes dos llingües diba ser meyor porque la xente enterábase de lo que queríen tresmitir. Agora bien, comparto con ellos la reivindicación que fixeron, porque nun se pue permitir qu’una llingua nun tea reconocida porque ye cultura del nuestru país. Home, creo que lo importante ye qu’al final entendímonos toos.

¿Qué opines de les crítiques que recibisti na to páxina web?
Les que se fixeron con educación, respétoles. Pero cuando s’usa l’insultu pa reivindicar una cosa, parezme que nun hai que face-y casu. De toles maneres, toos somos humanos.

Asegures que tienes familia asturiana. ¿Nun conocíes la situación del asturianu?
Sí, sí, mio tíu ye asturianu, pero sinceramente nun conocía esti problema. L’asturianu tien que se reconocer como llingua porque, amás de ser milenaria, ye un idioma que güei inda se fala.

¿Cómo ye eso de que vas cantar una praviana nel to próximu trabayu? ¿Por qué escoyisti esi tema?
Lo que son les coses: hai un añu y mediu que vengo preparando esi cantar, qu’interpretaba El Niño de la Rosa Fina, de Casares. Ye una canción mui guapa y queremos metela pal discu siguiente. Esti cantar escoyílu porque ye impresionante y tien unos xiros bien guapos. La canción va llamase Amor en Pravia.

¿Prestaríate facer un duetu con Dixebra?
[Rise] Encantada, claro que sí. Diba ser una bona manera de callar boques malignes que me dieron tantos palos... Mira, esta praviana taría bien pa cantala con Xune. Yá canté en gallegu con Luar na Lubre y prestóme muncho la esperiencia.

Dalgunos entendíos comparen a Diana Navarro con Enya. ¿Ye pa tanto lo tuyo?
Home, ye guapo que te comparen con una artista d’esa categoría, pero parezme que caúna nel so camín. Yo toi tovía empezando, anque llevo cantando dende que tenía nueve años. Cuando ún escucha’l discu pue sacar les sos propies conclusiones.

¿Cuála foi la mentira más grande que se publicó sobre ti?
Esta última, la de que yo me ri de la llingua asturiana, cuando ye tolo contrario. Esti tema dolióme muncho porque un compañeru vuestru de profesión escribió que «la folclórica pide disculpes», asina, en tonu despectivu y en plan de que yo fixera burlla del tema y desprestixara l’asturianu. Tengo que dicir tamién que punxeron palabres na mio boca que yo nunca dixi en nengún momentu. Eso nun fai más qu’invitar al tracamundiu.

Hai poco celebróse’l día de la Muyer. ¿Cuál crees que ye’l puntu fuerte de la muyer na música?
Creo que la nuestra manera de cantar, el timbre de la voz. Y ye por una cosa simplemente natural, porque’l primer soníu qu’escucha un fíu ye’l de la ma, siempre ta en contactu. Entós, a lo meyor ye que tenemos esa ventaya y por eso les voces femenines, nun momentu dau, pueden llegar más a la xente.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam