Asturies

Descubren nos Picos d'Europa la mayor travesía subterránea del Estáu Español

20/08/2010 a les 14:32:16

La espedición Culiembru 2010 entamada pol Cave Diving Group de Gran Bretaña, na que participaben espeleólogos asturianos del Grupu d'Espeloloxía Gorfolí col sofitu de la Federación de Espeleología del Principado de Asturias (FESPA), consiguió unir esti veranu el Pozu'l H.itu cola Cueva l’Agua de Culiembru, nel ríu Cares. El Pozu'l H.itu, con más de mil metros de profundidá, foi la primer cavidá esplorada de los Picos a finales de los años setenta.

El 30 de xunetu, los espeleólogos, dirixíos por Chris Jewell, depués de pasar el cuartu sifón inundáu de la Cueva l’Agua de Culiembru, llegaben a un llagu subterráneu onde podía lleése la inscripción «OUCC 1979-81». Yera'l, hasta entós, final de la del Pozu’l H.itu, a 1.124 metros de profundidá con respectu a la so bocana, que s'abre prósima a la Vega d’Ariu.

Depués de 30 años d'esploración, superábase la barrera de los mil metros de profundidá qu'esplorara'l Oxford University Caving Club. El resultáu de la nueva espedición ye'l descubrimientu de la mayor travesía subterránea del Estáu, y una de les más complexes y profundes del mundu, con 1.232 metros de desnivel de bocana a bocana. La profundidá total de la rede ye de 1.264 metros, siendo la sétima sima más fondera del Estáu y la vixésimo novena del mundu.

La Cueva l’Agua de Culiembru –con munchos tramos enllenos d'agua, lo que dificulta la esploración– tien cuasi cuatro kilómetros de galeríes topografiaes yá, pero la cavidá forma parte d'un sistema subterráneu que recueye agua de tola Vega d'Ariu, nel coral del macizu occidental de los Picos d'Europa. Asina que'l trabayu nun acaba equí.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam