Cultura

David Artime presenta «La bufanda»'l vienres 27 d'agostu en Xixón

27/08/2010 a les 09:27:16

L'escritor candasín David Artime Coto presenta güei vienres 27 d'agostu en Xixón la novela La bufanda, que resultó ganadora del Premiu de Narraciones Trabe 2009. La cita ye a les 19.00 hores nel marcu del Salón del Llibru, na carpa del Náuticu.

Cola novela, Artime inaugura la so trayectoria como novelista con una historia que, con humor, ironía, dramatismu y crítica, adiéntrase nun tema virxe dafechu na lliteratura en llingua asturiana y, pal casu, tamién nel restu de llingües del Estáu: el de los ultres de los equipos de fútbol.


La bufanda cuenta les situaciones nes que se ve involucráu un ultra del Sporting nel últimu tramu d’una lliga na que’l club llucha por evitar el descensu. «Con un llinguaxe modernu y frescu, lliterariu y cuidáu, l’autor va filando una mecigaya de sentimientos enfrentaos, dende los más nobles y altos valores hasta los instintos más baxos, que conviven na mente de los auténticos hinches», indiquen dende la editorial Trabe.


David Artime Coto (Candás, Carreño, 1979) estudió Ciencies de la Información y trabaya como periodista. Ganador de dellos premios lliterarios, ente ellos el Premiu Arbidel de rellatos eróticos n’asturianu nel 2009 y 2010, ye amás responsable d’una adaptación teatral de la novela José, de Palacio Valdés.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam