Cultura

Cultura autoriza la destrucción parcial del camín prehistóricu de Carondio

30/12/2009 a les 12:49:33

Les obres que se tán faciendo n’A Serra de Carondio pa instalar ellí un parque eólicu cuenten, según fontes de la Coordinadora Ecoloxista, col preste de la Conseyería de Cultura. La Coordinadora Ecoloxista denunciara’l 7 d’avientu pasáu énte Patrimoniu, la Fiscalía y la Guardia Civil l’estrozu d’una parte del camín prehistóricu conocíu como La Carreiriega de los Gallegos pa facer les pistes que dan pasu a la maquinaria que va instalar ellí los aeroxeneradores. Na denuncia pidíase la paralización de les obres por afección al patrimoniu históricu.

Ayeri martes, 22 díes depués de la denuncia, un arqueólogu de la Conseyería de Cultura, acompañáu del serviciu técnicu del Seprona, xubió a Carondio a valorar los daños. Al parecer, esos estrozos taben autorizaos nel proyectu de Cultura, que prevía convertir parte d’esta vía antigua en vial pal parque eólicu. Polo tanto, cuéntase archivar la denuncia. A pesar de les peticiones de contino de la Coordinadora Ecoloxista, la Conseyería de Cultura nun-y dexó acceder al espediente del parque.

Na rodiada, d’altu valor arqueolóxicu –con 34 túmulos catalogaos, aparte del camín prehistóricu, La Carreiriega de los Gallegos, y los restos de lo que too indica que ye un campamentu romanu–, HC Energía va instalar 25 aeroxeneradortes de 60 metros d’altor.

  Facer un comentariu

Dexa'l to comentariu nesta noticia. Habrá publicase desque pase una revisión. Lesnoticies.com acuta pa ella'l derechu d'eliminar o modificar los comentarios que contengan llinguaxe inapropiáu, spam o otres conductes que nun sían les propies d'una comunidá civilizada. Si'l to comentariu nun aparez, pue ser que nun pasara'l filtru de la revisión.

  El to nome El to e-mail El to comentariu
Códigu antispam